on.cc 東方互動主頁

ASK 753SP　3G ICS神板

一般國產平板因為要個價做得平，所以通常都唔會推出3G版，不過無3G SIM卡支援就無法隨街上網，未免令人卻步。有鑑於此，近排ASK就推出753SP，最大嘅特點係採用國產最強處理器A10 AllWinner同內置3G SIM支援，對於成日網上睇片嘅用家嚟講，真係好有吸引力。

操作自然流暢

小記覺得，與其話佢係Tablet，倒不如話佢係一部電話。因為ASK 753SP並非行Android蜂巢或薑餅系統，而係用上平板同手機功能都一致對應嘅ICS雪糕三文治系統，所以介面自然流暢，操作猶如行雲流水。而電話功能方面則非常齊全，內置3G功能又並無加大其機身，厚度同外觀跟一般國產Wi-Fi Tablet差唔多，雖然未去到十分靚仔的級數，但係拎上手都不會覺得過分厚重。

3G功能齊全

作為一部3G Tablet，最怕好似啲大品牌嘅蜂巢Tablet咁欠缺電話功能，但因為ASK 753SP採用ICS系統，而且機身上亦有作出特別設計，具備聽筒同埋有內置Mic，令用家不用免提都可直接拎嚟打電話。753SP機身設計極其簡約，除開關之外，就只有音量控制實體鍵，其餘Home、返回及菜單鍵皆係觸控鍵，設計正統，勝在用得順手。

播片打機無問題

此機用上國產最強嘅A10 AllWinner處理器，呢粒U最強之處在於前無古人嘅播片效能，支援比藍光格式1,080p仲要高嘅2,160p格式，加上可以支援HDMI輸出至3D大電視，做埋3D視效都仲得，都咪話唔巴閉。而處理器雖然係單核，但效能都唔算差，一般Android遊戲都難唔倒佢，好似《Angry Birds Space》、《Asphalt 6》等大食遊戲一樣照行得順，二千蚊乜都得，都相當值得考慮。