有機木熏出無添加靚扒
愛吃生蠔的，相信不會對賣生蠔出晒名、餐廳Oyster Express的老闆娘Winnie感到陌生，最近她又有新搞作。今勻不以生蠔作主打，改以無添加靚扒掛帥，同樣位於山林道的新店，名叫Steaks Express，以標榜自由放牧、無激素、無抗生素的靚牛作招徠，天然而健康；配合不同有機木作煙熏，皮脆肉嫩同時散發淡淡木香。
一向愛吃的Winnie，不單止是生蠔迷，更愛吃牛扒，眼見近來扒房大熱，但裝潢多是黑沉沉，所以今次開的Steaks Express，特別以明亮簡約的設計，黑白色瓷磚地板、掛滿相框的Love Corner、仿草牆身等等，為食客添上窩心、舒服的感覺。
全天候煙熏
作為一間扒房，牛扒來源是重點所在。Winnie注重天然健康，故此店子的牛扒統統是自由放牧、無激素、無抗生素的貨色，牛味特濃又夠安全健康，尤其是來自美國Creekstone Farms出品的Black Angus，牛隻以穀飼養，比一般草飼牛更肥美、油花更均勻細緻，吃得出的上乘。而大路一點的，則有美國Prime級牛扒、澳洲M6和牛及加拿大重20安士的帶骨牛扒，選擇夠多夠齊。食材靚，做法亦講究，Winnie特別在美國訂購一台價值數萬元的烤爐來燒製牛扒，把牛扒放在300℃的鐵板上煎香，鎖緊內裏肉汁，之後再移到旁邊的Open Fire爐面燒至不同的生熟程度，最後才把牛扒放在Maple、Alder或Red Oak的木板上，並加入木碎一同煙熏約5分鐘，一台烤爐做齊煎、燒、熏3個步驟，令牛扒集焦脆及嫩滑之餘，並散發陣陣的大自然氣息，滿室盡是肉香木香。
白松露飄香
除了主打的牛扒，以生蠔起家的Winnie，亦精選了一些海鮮，例如珍寶帶子、8吋大虎蝦、比利時青口、阿拉斯加皇帝蟹腳等，做法以煎及燒為主，更能突出海鮮的鮮甜味。另外，多款頭盤、意粉，甚至甜品，皆見白松露的蹤影，用料矜貴，然而現時非白松露當造季節，那何來新鮮貨？原來Winnie曾從事白松露批發，每到當造期時，她會特別留起原粒新鮮白松露，並以橄欖油自家浸泡，製成香氣滿滿的白松露油，用來炮製多款美食，如焦糖燉蛋，甚至混入有機蜜糖調成醬汁等，小記就推介溫泉蛋薯蓉配特色白松露醬汁，以法國有機薯仔加入新西蘭牛油及澳洲牛奶製成，中間有一隻日本溫泉蛋及淋上白松露油，質感濃滑又夠香，是鋸靚扒以外的另一個美味選擇。
Shop Info
Steaks Express
地址：尖沙咀山林道23號地下
電話：2575 6778
Greater Omaha CAB Ribeye $328/10安士
牛扒來自自由放牧的美國牛隻，不含賀爾蒙、抗生素或類固醇，經煎、燒、煙熏後，肉質表面帶點微焦，入口卻很鬆化，既有濃香肉味，亦有淡淡木香。
其中一面紅色牆上掛滿相片，Winnie稱此為Love Corner，最啱情侶們來鋸扒，So Sweet！
西班牙黑毛豬火腿（36個月） $298/100克
甘香黑毛豬火腿，鹹鹹鮮鮮，另會配上黑橄欖、珍珠洋葱，以及自家製的白松露蜜糖，以甜香帶出火腿鮮味。
溫泉蛋薯蓉配特色白松露醬汁 $78
全以頂級靚料炮製，法國有機薯仔、新西蘭牛油、澳洲牛奶製成的薯蓉，入口香滑，配上蛋香十足的日本溫泉蛋，最後淋少許芳香白松露油，香濃滑！
香橙甜酒法式燉蛋 $78
大廚在傳統的Crème Brûlée中創新，加點鮮磨的橙皮蓉及Baileys一同焗製，每一口都夾着清新與酒香。
鹽燒8吋多膏珍寶大虎蝦 $98/隻
足有8吋的大虎蝦，長如手臂，同樣連同木碎燒香，入口爽彈鮮甜，激讚！
Creekstone Prime Natural Black Angus Sirloin $428/13安士
來自美國Creekstone Farms的Black Angus，肉味濃得很，經熏過後，更帶微微焦香，天然健康又夠Juicy。
意大利肉腸香濃番茄醬意大利麵 $168
特選意大利番茄與雜香草製成的醬汁，混和意粉炒香，加點鹹鮮的Salami腸，極度惹味。
3種來自加拿大的木，分別是帶甜香的Maple、酸味重的Alder及香氣出眾的Red Oak，供客人揀選後，用以燒製牛扒。
店子用上澳洲粉紅海鹽來燒扒，味道不一味死鹹。
直擊靚扒誕生！
先把澳洲粉紅海鹽、印度胡椒籽及香料等塗在牛扒上。
放到300℃高溫的鐵板上燒香，以鎖住肉汁。
牛扒移到Open Fire的爐面上燒至客人指定的生熟程度。
把牛扒放在不同的木板上，並加入木碎冚蓋進行煙熏。不消一會，一塊充滿焦香、木香的靚扒便可以上枱。
光猛、簡潔的裝潢，有別於傳統黑沉沉的扒房，朝氣十足。
Steaks Express