ES特裝機兵精密Q版合金
《特裝機兵》係乜東東？可能你會摸不着頭腦，不過改名做《三一無敵》，就會即時有番印象啩！上世紀80年代無記將《特裝機兵》譯成《三一無敵》，主角三人組之中嘅無限真人，就揸住部吉普車變機械人。咁多年嚟，《特裝》嘅商品都唔算多，最多人識可能只係CM's的Brave合金，香港品牌Action Toys唔怕冷門，旗下嘅《ES合金》繼天威勇士後，首次挑戰完全變形作品，整咗呢部Q版Calibur，比例順眼又送埋人仔，最重要係Q版都識變形，唔到你唔服！
變形結構準確紮實
ES Calibur嘅最大賣點在於變形設計，步驟簡單而精細，首先頭頸位置向前拉出，並且拆埋頭部，之後縮起雙腳關節，再於髖位兩側拉出延伸關節，注意要將整支關節成一直線完全拉出，至於肩甲及腕甲都要扣實。跟住就將頭冚、胸甲，以及背脊成塊泵把連輪拱向上揭起，呢個時候，變形戲肉終於出場，就係按住左右兩邊嘅彈弓手，並且向前摺疊再放手，千祈唔好用蠻力，以免扯斷彈弓，最後將雙腳扳後，並且鎖死喺輪拱後面，再將背包拉落嚟包住髖關節，裝埋步槍及揭起擋風玻璃，放埋主角人仔落車就成事。
金屬成分落足料
雖然係Q版合金，但變形設計相當精密，而且兼顧可動性，例如膊頭及髖位兩側有Ball Joint、小腿跟大腿之間暗藏拉出式關節，以及解開腰背榫位有額外回轉關節，可以擺出自然嘅持槍甫士，甚至單膝跪地。另一抵讚之處，係合金成分極高，成個頭冚及大腿都係Die-cast製成，確保擺甫士嘅穩定性，變形時都穩陣得多，唔似全膠件咁易一啪即爛。此外，玩家仲可以拆開面罩、加入兩粒LR41電餅，之後撳住後尾枕嘅開關，就玩到着燈Effect。本地薑有咁高質素，日本嘅B記、海記等玩具大廠，係唔係要好好檢討吓呢？
©Production Reed 1983
查詢：2390 9843（Action Toy II）
ES-GOKIN Series 08 特裝機兵Calibur 建議訂購價：$380
變形Step by Step
1.揭起頭冚，縮埋雙腳關節，再將髖位兩側完全拉出延伸關節；
2.撳住左右兩邊嘅彈弓手，並且向前摺疊，之後放手，記住過程唔好太大力；
3.將雙腳從後扳上前，並將腳踭鎖死喺輪拱後方，最後插上武器及揭起擋風玻璃。
4.Q版比例嘅吉普車，造型可愛，而且變形後相當紮實，唔易走樣。
當年喺無記播放嘅《三一無敵》，相信唔少70後、80後仲有印象。
解開腰背榫位，上半身就可以大幅扭動，增加活動範圍。
無限真人Figure雖然的的骰骰，不過塗裝絕不馬虎。
手腕只得單關節，不過肩膀Ball Joint有助增加可動性。
大、小腿之間有拉出式關節，可以屈膝成90°直角。
擋風玻璃下暗藏座位，可將無限真人直接放入去。
配件唔算多，除咗專用台座，只有一把步槍及兩款造型手掌。
據廠方表示，ES08大貨已經準備好，只等日本方面先派貨，想信香港訂家可以很快收貨。