25,000平方呎Playroom　玩樂無窮

近日的天氣，時晴時雨，家長們周末想帶小朋友出外遊玩都幾有難度，就算不計天雨路滑、蚊叮蟲咬，只要抬頭一望，見到灰蒙蒙的天空，好心情都被一掃而空……幸好坊間室內Playroom愈開愈多，天氣好壞都不再受影響，好似在荃灣開業3個月的新場地，有齊練車場、大型攀爬架、小田園天地，還有充滿挑戰性的充氣彈床，玩埋歷奇都仲得！

位於荃灣協和廣場、佔地25,000平方呎的花栗鼠寶堡，室內及室外的活動場地有多項好玩設施，包括安全又具挑戰性的充氣彈床區、攀爬競技場、兒童學車區以及戶外小田園區域，啱晒精力充沛的小朋友。而為了迎接復活節及夏季的來臨，遊樂場總經理鄺小姐表示，將會新增戶外迷宮城堡以及一條設有3條滑道的滑水梯，讓小朋友們來一個「夏水禮」！

針對近日令到全城家長恐慌的疑似拐子佬事件，鄺小姐表示，假日時會多派工作人員駐場，進場人士均有手帶識別，亦不會讓未有攜同小朋友的成年人進場。而小記早前獨自到訪該處時，也有職員禮貌地查問：「是否初次到來？小朋友在哪兒？」等等的問題，果然注重安全，家長們也可以玩得安心！

第1站 充氣彈床區

等我哋齊齊推開阻路的大欄杆先。

小山丘輕輕鬆鬆就爬上去啦！

再穿過一個大咕窿，就到達巨型攀岩牆喇！

咪以為彈床跳下彈下好易玩，想到達比成人還要高的巨型攀岩牆，先要過五關斬六將，穿越大小障礙物，好有挑戰性！遊樂場稍後更會推出歷奇班添呀！

第2站 攀爬競技場

聲稱為全港最大的攀爬架，睇落又真係幾宏偉！

行獨木橋最緊要講平衡，心靜再加上眼到腳到，好快行過去喇！

沙包陣無難度，精靈晴晴轉眼就通過！

從全場最矚目的5米高波浪形長滑梯衝下來，迎接大家的是七彩繽紛的波波池，又可以大玩特玩。

第3站 兒童學車區

充滿歐陸風情的馬路設計，仿真度頗高，設有多款路牌，家長可以一齊同小朋友「煉車」。

第4站 戶外天地

天氣好的話，可以玩盡戶外彈床設施。

特設的有機小田園可一嘗做農夫的滋味！稍後亦會推出有機耕種親子課程，讓小朋友學習做農夫。

租田服務一個月$250

同場加映：假日驚喜

場內設有5間不同主題的可愛動物派對房，可以為小朋友舉辦生日會。

每逢星期日均有小丑及大公仔在場內四出走動，為小朋友送上神秘驚喜！

花栗鼠寶堡

地址：荃灣川龍街協和廣場3樓

收費：$75（星期一至五）、$150（星期六、日、公眾假期）（包括1位小童及1位大人）

查詢：3749 9428