App士多

iOS篇：《Charadium II free》鬥快估生字

近排最Hit的iPhone App非《Draw Something》莫屬，不過好多人為咗畫幅驚世傑作，喺度慢慢畫、逐筆改，搞到一來一回節奏慢到死！若果你都有同感的話，小記就極力推薦你玩《Charadium II free》；新App雖然同屬「猜猜畫畫」類遊戲，不過畫同估都限時完成，刺激度大很多。

限時鬥估

新Apps精粹在於限制繪畫時間，喺短短一分鐘內你就要完成作品，而且就連負責估嗰幾位玩家都要限時估答案，難度即時提升唔少。不過唔好以為亂咁畫就可以過關，因為有人估中的話，畫個位都會獲得Bonus分數，想高分就要畫得又估得先掂。

網上挑機

《Draw Something》就透過Facebook連線，來來去去都同班熟人玩；新App就利用線上平台聚集玩家，隨機搵玩家同你一齊玩。亦因為呢個Apps極受外國人歡迎，所以不時出現估字高手，甚至圖畫畫到一半已經成功估出，超誇張！唔想畀高手蹂躪的話，亦可以選擇三五知己開個Private Room，慢慢玩都得。

Android篇：《Chrome for Android Beta》一掃換分頁

Android一向有唔少第三方Apps，單是瀏覽器就有Dolphin Browser、Firefox、Opera等選擇。最近就連Chrome亦轉戰Android，推出《Chrome for Android Beta》。與桌面版一樣，新App同樣主打瀏覽速度，更創新地加入一掃換分頁，用落超方便！

無限分頁

桌面版Chrome一向以速度見稱，而Andriod版本亦同樣Sell快。雖然介面設計簡單，不過Chrome就優化網頁載入、捲動、放大等功能，用落確實好順暢。最特別是新App支援無限分頁，簡單用手指向橫一掃更可以轉Tab，開幾多個網頁都咁就手。

桌面同步

此外，新Apps更可以與桌面版的Chrome軟件進行同步，簡單設定後就可以將書籤及瀏覽中的網頁同步至手機，咁就可以將常用網頁傳番落手機，追Post更容易。不過要留意，此App暫時只支援Android 4.0或以上的裝置，亦不支援Flash插件，鍾意睇Flash短片的朋友就未必啱用。

Hot Picks

《Adobe Photoshop Touch》：iPad執相

先前已經有《Photoshop Express》上架，不過功能太簡單。《Adobe Photoshop Touch》就專為iPad 2而設，執圖工具大增，包括Scribble Selection Tool、Refine Edge，加上圖層、抽取、淡出等工具，隨時執相都冇問題！

《HK Road Info》：揸車路路通

早前獅隧着火就搞到大塞車，唔想返工遲大到，就一定要隨時睇實《HK Road Info》。此App提供香港道路實況，包括所有交通消息、道路改道等等，消息更來自政府網站，包保準確。

《Skater Boy》：踩板高手

此遊戲玩法極似《Mario》，只需利用加速、起跳去操控遊戲中的板仔，從而避開路上的障礙物即可，遊戲勝在節奏快又簡單，返工玩吓好輕鬆！

《NBA Pro'12》：詳盡NBA

NBA球員交易死線美國時間3月15日就到，要知NBA最新動向，《NBA Pro'12》就一定幫到你。新App提供賽果、排行榜、消息等基本資料，就連球員薪酬、Bio亦有，咩轉會都冇走雞啦！