三藩市直擊MS Spring Showcase投球打大象

遊戲界大趨勢係Casual Gamer市場不斷擴大，與其花幾百蚊買套遊戲，Casual Gamer反而會選擇下載簡單遊戲例如Xbox LIVE Arcade過吓日辰，所以今年MS Spring Showcase另一重點落在LIVE Arcade遊戲之上。唔好以為Arcade遊戲製作粗糙、可玩性不高，新近推出的《I am Alive》就係打破成見之作，今次試玩會上更有一套扮演棒球投手打怪獸的Arcade Kinect遊戲《Diabolical Pitch》，玩法新鮮有趣！

《Diabolical Pitch》（Kinect） 棒球做武器

預計推出日期：2012年

期待度：5

Arcade Kinect遊戲都係以Mini Game為主，點似得《Diabolical Pitch》咁花氣力！遊戲主角係一個投球手，武器就係取之不盡的棒球，攻擊招數係要右手作投球動作，動作大啲就會提升投球速度加強殺傷力。但只係由右手投球的話，電腦會幫你揀敵人去攻擊，如想指定攻擊目標就要用埋左手指向特定敵人先得，而且儲滿氣舉高雙手更可發出必殺投球，但次次都要用力投球都幾攰o架！

角色場景 設計邪惡

場景設計亦很有趣，敵人設計得幾邪惡，有啲似邪惡版《愛麗絲夢遊仙境》，如玩到第二關會入到遊樂場之中，嘍囉係樣衰衰的兔仔，而大佬就係一隻兩腳直立的機械象，打贏佢就玩完個試玩版，難度唔大，但就好費力。齋投球查實都幾悶，所以遊戲就加插要雙手接波以跳過飛刀等動作，亦要好似玩老虎機咁投中場景中間歇出現的圖案，連續命中相同圖案就可賺多啲錢，過關後更可用錢購買棒球卡提升能力，內容都幾豐富！

熱捧：《Joe Danger：The Movie》

預計推出日期：2012年內

期待度：4.5

《Joe Danger》係一個受歡迎的下載遊戲系列，新作《Joe Danger：The Movie》中要在荷里活片場上駕駛唔同交通工具，再要使出各種特技演出。

《Wreckateer》（Kinect）

預計推出日期：第一季

期待度：4.5

《Wreckateer》無《Diabolical Pitch》咁花氣力，玩法係以體感操作以強力彈弓投擲炸彈摧毀城堡，炸彈飛行途中更可以體感方法微調方向以觸發炸彈隱藏威力，極易上手。

《Fable：Heroes》

預計推出日期：2012年內

期待度：3

食住《Fable》系列個勢頭，Lionhead Studios轉出動作遊戲《Fable: Heroes》，從可愛風畫面所見，都可預期遊戲係為Casual Gamer而設，試玩感覺就一般啦！

必玩：《Trials：Evolution》

預計推出日期：第一季

期待度：5

《Trials HD》已經叫好叫座，同樣以操控特技電單車跳過重重障礙的《Trials：Evolution》既提升遊戲精緻度同可玩性，更支援四人連線對戰，衝過終點一刻更做得超爆笑，屬必下載之選！

《Bloodforge》

預計推出日期：2012年內

期待度：4.5

另一套現場頗受歡迎的XBLA遊戲《Bloodforge》賣點係黑色角色場景加血腥戰鬥，美術設計出色，玩落都幾型，不過打打殺殺啱男仔玩多啲囉！

《South Park：Tenorman's Revenge》

預計推出日期：2012年內

期待度：4

《South Park》（衰仔樂園）這套卡通話題性十足，以這班衰仔做主角的XBLA遊戲已去到第二套，新作支援四人連線，玩法仍是橫向動作，造型可愛但可玩性都係一般。

Win Phone 遊戲湊熱鬧

今次活動話明係MS自家遊戲大晒冷，又點會少得Windows Phone遊戲的一份，但展出的Windows Phone遊戲其實又唔算太特別，好似幾隻焦點遊戲《PES 2012》（即Winning）、《Civilization Revolution》、《Sid Meier's Pirates》咁都已經在其他手機平台上推出過，但即場測試遊戲表現都幾順暢，叫做係至少做到人有我有，證明Windows Phone都有好多手機遊戲大作可玩！