三藩市直擊MS Spring Showcase全身開打《重鐵騎》
距離6月的E3遊戲展雖然仲有3個月時間，但Microsoft已經提早廣發邀請，請來全球傳媒來到美國三藩市出席「MS Spring Showcase 2012」活動，率先體驗年內推出的遊戲大作，好似要用上手掣跟體感操控的超重型作品《Steel Battalion Heavy Armor》（重鐵騎）更係首次有得試玩，臨場感十足！至於《Halo 4》同新發表的《Forza Horizon》都只係以閉門形式播放簡短預告片，都明嘅，始終都要為E3留力！
《Steel Battalion Heavy Armor》（重鐵騎）Kinect
體感配手掣操作
資歷深嘅機迷都應該聽過、睇過甚或玩過2002年推出控制巨型機甲大炮作戰的《鐵騎》，當年在初代Xbox平台上登場時畫面靚得誇張，但因為要營造到極像真的操控感覺，需配合有幾十個按鈕的大型操控桿操作，除非常Hardcore機迷之外，一般玩家都會嫌操作太煩及成本太貴而放棄這好Game。10年後新版本《重鐵騎》就結合Kinect體感操控加上手掣操控，將煩得緊要的幾十個按鈕轉換成體感操控，好似可以用手拉低各個把手操控機甲各種活動，企起身時更可推開機頂天窗，將手放在眼旁就可啟動望遠鏡，而手掣就用作控制前進方向同發射機關炮同導彈，雖然玩落都唔太容易，但比起當年《鐵騎》已經平易近人得多！
跟同伴互動
不過要學識操作始終唔係一兩分鐘嘅事，要用15至20分鐘完成Tutorial先可以進入戰場，但時間絕對值得花！至於試玩版第一幕就係搶灘，面對遠方防衞兵的猛烈攻擊，即使機甲大炮夠重型、防禦力強，但都依然一步一驚心。本作畫面表現水準好高，硝煙跟爆破完全呈現眼前，而且唔少場面中仲可同駕駛艙和其他同伴互動，互相激勵，完成任務後真係好有成功感，不過同玩《Kinect Sports》一樣，要付出唔少體力o架！
其他Kinect大作
《Fable：The Journey》聲控加體感出魔法
由God Games神級製作人Peter Molyneux親自介紹的新Kinect遊戲《Fable：The Journey》，雖以閉門形式進行，但都有請傳媒試玩。試玩分成兩部分，第一部分主角要以體感方式操控馬車，本身都唔太易控制，途中馬匹有機會中箭，要拚命極速逃到安全地點，主角更要從馬匹身上拔出箭頭，跟住施魔法醫好馬匹。第二部分就輪到主角用體感施行魔法，左手主要用作吸起物件，右手則進行攻擊，最勁係製作人表示遊戲可以配入聲控系統操作，嗌得激昂同大聲啲，攻擊力量會提升；至於叫得細聲啲就會加強左手力量，而內容係中文或其他語言都得，都幾搞嘢喎！
預計推出日期：2012年內
《Kinect Star Wars》扮大怪獸搞破壞
《Kinect Star Wars》會係上半年Kinect最勁之作，4月頭正式推出，現場當然唔少得將部星戰特別版Xbox 360加Kinect主機套裝連金手掣畀大家開吓眼界，而且今次開發的更已是完全版，仲公布埋星戰會係第一隻真正3D Kinect遊戲，大家要戴住副3D眼鏡睇「格劍」畫面，不過3D效果未算太突出，要到電影版Podracer大戰先感受到當中的立體感。有得試嘅新模式仲有Rancor Rampage，玩家要用體感方式「親自」飾演大怪物，又跳、又跑、又撞，盡情破壞周圍的建築物，都幾抵死o架！
預計推出日期：4月
《Kinect Rush：A Disney-Pixar Adventure》同Pixar角色齊齊玩
某程度上睇係《Kinect Disneyland》的延續，以主題樂園背景加入大量體感迷你遊戲，不過今集既可用迪士尼角色之外，連Pixar角色都有，好似可以進入「反斗車王」遊戲區同閃電王麥昆鬥車，小朋友啱玩之餘，連筆者呢類大朋友都啱玩！
預計推出日期：3月
Xbox 360注目新作
《Halo 4》公開兩張多人地圖
《Halo 4》今次Spring Showcase只係「騷少少」，公開兩幅多人對戰地圖「Warhouse」跟「Wraparound」的全相，另外播出一段在這兩幅多人對戰地圖上的戰鬥影片。《Halo 4》要保住《Halo》系列金漆招牌，示範片段可見作戰速度感甚強，連環境上的煙霧都做得好有水準，希望到E3時真係有得試啦！
預計推出日期：年底
《Forza Horizon》似《NFS》
今次Showcase中發布今年秋天推出的《Forza Horizon》，這Game交由英國Playground Games開發，而現場預告片中，鬥車時速度感極強，分明想搶埋《NFS》這類賽車市場！
預計推出日期：今秋
《Resident Evil：Operation Raccoon City》率先試獨有模式
這Game月尾就會推出，而今次Showcase就試玩Xbox 360獨有嘅Nemesis多人戰模式，現場有八台機試玩USS跟Spec Oops四打四兼要打喪屍的劇鬥模式，唔小心畀喪屍咬一啖都會變喪屍，食唔切解藥就會短時間內死去，都幾刺激！
預計推出日期：3月
Alexis（法國）
「始終都是一款好講究操作技巧的遊戲，係需要時間去學習操作，由於我只係完成Tutorial部分，好難評價遊戲有幾好，但初步感覺係遊戲平衡性做得唔錯，至少比多年前在Xbox推出的上一代操控來得簡單。」
Thomas（奧地利）
「比起上一代要用上超大型操控桿，有成十幾個Switch需要調校，但新一集以手掣配搭體感式操控，操作上明顯更有邏輯。遊戲還有唔少跟同伴互動的場面，相當有趣，至於畫面同音效表現都幾高水準。」
