龍五帶路 地踎店邊燒邊烚

要數香港人最喜愛的飲食聚會，必定是「打邊爐」和「燒嘢食」，但講到地點，前者在室內；後者於戶外。點先可以「順得哥情又唔失嫂意」？答案是同場進行。平時小記多數去土瓜灣「鴻福」，欣賞它以炭作燃料，邊打邊爐邊燒烤，甚有香港風味。最近沙田友就推薦河畔花園的「廣東人小廚」，一於約埋龍五去試食，睇下夠唔夠地道！

Round 1 Taste

約朋友食飯，你會怎樣挑選餐廳？有人會去飲食網站查看最新餐廳、有人會揭報紙同睇雜誌，但更多人會向Blog埋首，參考Blogger的飲食地圖。Blogger龍五就話當初在飲食網站寫食評，只是想記錄自己的「美食經歷」；其後開Blog則是想記錄「食事」及囡囡的成長路，到今天有人會看其Blog搵食實屬無心插柳：「其實我都會參考其他人的食評，但只限於文字內容簡潔紮實的食評，那些Point Form形式或賣弄自己幾識食的食評就不在考慮範圍內，因為毫無參考價值。」

炭爐風味

香港餐廳眾多，問龍五會介紹甚麼餐廳，他坦言：「由於時間有限，我偏向寫一些冷門店，而值得推介的餐廳，必須符合味道好、店方用心及香港風味或傳統美食；由於本地用炭爐的餐廳已經買少見少，所以『廣東人小廚』正符合港式風情的環境。」不少酒店都供應燒烤自助餐，由專人負責燒，大家可以翹埋雙手等食，但龍五就認為酒店燒烤雖然方便，又能免卻飯後一身燒烤味，價錢卻相對較貴；而今次試食的街頭風味價錢就較大眾化，自己落手燒的靈活性較大，加上親手煮的食物特別好味，他就較喜歡這些小店情懷，一來是獨有風味；二來炭火火力較平均，只要烹調得宜，食物會比普通煎煮的更好味。

滿足兩個願望

除打邊爐外，這裏可以同時以炭爐打邊爐，適合心多多的香港人，同時又烚又燒的話，還可以將火鍋料變作燒烤料，發揮臨場創意。火鍋方面，豬牛雞、海鮮、丸類、蔬菜及自家製食物皆備；燒烤則只有海鮮、肉類、素菜，選擇較火鍋的少，建議叫多幾個朋友一齊去，邊烚邊燒。值得一提的，是整頓飯都沒有出現炭灰四起的情況，原來店方選用可以持續燒個多小時的棕欖樹煤炭，難怪冇炭灰又冇炭味。

Round 2 Ambience

既然係街坊店就唔好要求有靚裝修，雖然坐路邊，但與馬路仍一段距離，訪問當晚正值下雨，幸好簷篷夠大，完全沒有被雨濺到；不過亦是戶外位置，較為通風，大擦一餐後，身上都沒有半點炭味，在寒風下歎燒烤同打邊爐，別有一番風味。

Round 3 Service

清一色叔叔輩侍應，雖然面無笑容，但其實很貼心，冷不防從背後以燒烤夾幫你翻翻食物，避免燒焦；又會主動提醒你邊啲食物已熟可吃，避免過火；更有侍應主動幫隔籬枱的客人燒烤，邊燒邊講解小貼士，正如龍五所講：「這些親民風味是小店的特色，如果見到客人唔識燒又唔幫忙，就是浪費食物。」

總評：

食物方面不算太特別，但由於餐廳以炭爐作招徠，想感受一下港式風情的話，不妨一試，但這裏的燒烤和打邊爐只限晚上供應，所以大家要注意了。試食當晚雖然是平日，但由於天氣微冷，所以附近不少街坊都特地光顧，建議大家預先訂位，免得白走一趟。

網上食評達人

綽號：龍五（ryu_ng）

簡介：70後爸爸，不是食家卻喜歡東吃西吃，為沉悶的上班生活減壓，同時希望為女兒留下美好回憶，繼而踏上寫Blog之路。

網址：colemanng.blogspot.com（瞳．年．夢）

試食檔案

廣東人小廚

沙田崗背街10號

2012年2月21日

2686 1778