EB 1/6 SCARFACE向大佬致敬

「出得嚟行，預咗要還」，做大佬更加走唔甩，就以《疤面煞星》（Scarface）嘅Tony Montana（AI Pacino飾演）為例，任憑佢一朝富貴，最後都要眾叛親離，死喺亂槍之下；然而，正係咁傳奇嘅電影角色，先令人入晒腦、多人講，繼「戰損版」之後，Enterbay為佢再出「尊敬版」Figure，新面相繼續保持高水準，西裝仲由日本裁縫炮製，認真到離晒譜！

《疤面煞星》一向係Figure界嘅熱門題材，香港有How2work、美國有SideShow，就連南韓嘅Blitzway都出過，去年E記就大膽起用片末Tony Montana發癲一幕為藍本，震撼整個Figure界，Like嘅人雖然多，但Dislike嘅亦有，原因係面相太惡死喎；有見及此，E記回應民意加推「尊敬版」，面相繼續由Y.J.Park負責，不過表情180°改變，成個樣斯文晒，亦沿用多層立體塗裝技術，膚色一層冚一層，令皺紋、鬚根都有晒層次感，美中不足係過於堅持改邪歸正，令眼神略嫌呆滯，唔及「戰損版」嘅反白眼搶鏡。

日本裁縫炮製白西裝

為咗忠於當年Al Pacino嘅標準身形，新版沿用RM-5素體，比舊Body更瘦更高，仲有40個關節，方便擺持槍Pose。前胸位置嘅「皮膚」採用PVC膠料製造，可以將附近嘅關節隱藏起嚟，表面又油咗少少胸毛，視覺、觸感都更逼真。服裝方面，有見於日製Figure都有較佳嘅造衫技術，今次E記特別聘請當地裁縫設計白西裝、長褲及關刀領襯衫，望落更加收身筆挺，鈕位仲改埋更薄、更細嘅鈕門，外觀順眼得多。配件方面亦算大堆頭，有齊金勞、黑超、金頸鏈、銀手鏈、雪茄及M92F連滅聲器手槍，加埋八疊美金，演活江湖暴發戶嘅形象。

同場加映：奸人再生

李小龍粉絲何其多，但沒有好對手，武功再高都難顯威風。Enterbay就應粉絲要求，終於用RM5.01新素體夾埋東方人面孔，驟眼看激似石堅叔，全身有25個關節位，只需另配手套、假毛，就可以DIY組合出《龍爭虎鬥》嘅韓先生。嫌自購服飾太麻煩？E記同場推出STYLE 313功夫套裝，有齊藍色長衫、灰色功夫褲、白襪及黑色功夫鞋，全套單售$350，若果連買兩個Body而其中一個係RM5.01，以上服裝就免費奉上，實在係功夫迷之福！

查詢︰2332 3615（Enterbay）