《I am Alive》末世求生

唔知係因為開發問題抑或想食住2012末世Feel，原本計劃在09年春天推出的求生冒險遊戲《I am Alive》，足足要等到三年後的2012年春天先至面世，仲變成平價的Xbox LIVE Arcade同PSN的下載版本！拖咁耐，令不少人都難免對呢隻遊戲期望度大減。幸而，遊戲嘅畫面表現、故事內容同遊戲操作都甚為對辦，唔止描繪大災難後的場景令人動容，其他幸存者的設定都好立體，動作成分高之餘又要用腦，百多元買到隻好Game實在超值！

美國背景塵土飛揚

玩開日系遊戲都知道有隻同樣以災後冒險為題材的遊戲《絕體絕命都市4》，不過因為去年日本大地震，為免觸景傷情，推出計劃都要無限期擱置。論故事內容，呢隻《I am Alive》其實都幾似，但背景就換上滿目瘡痍的美國大城市，而且畫面設計甚有水準，專登用上黑白灰色調兼塵土飛揚阻礙視野嘅效果，加上城市景物描繪得極像真，光源表現亦好有水準，令遊戲充滿浩劫後的頹垣敗瓦感覺，這方面比日系遊戲明顯勝一籌。

高難度跳躍扣體力

要在廢墟入面搵路走，當然要識得擒高擒低，跳過重重圍欄；《I am Alive》在動作設計雖然甚有《波斯王子》式的影子，有唔少誇張的高難度跳躍；但《I am Alive》擒高擒低、高難度跳躍甚至是快跑都會扣體力，可是只要在指定時間內完成整套動作，再在平地上休息，體力會自動回復；如在定時間內完成唔到，就會直接減低體力計的上限，要靠食物先可以提升。不過玩家要明白遊戲背景係個廢墟，搵食物、食水甚艱難，最初主角身上只得一罐罐頭同一支水，要慳啲使喇！

唔同招式應付幸存者

另一樣要慳住使嘅係子彈，最初玩家只係得一支空槍，玩玩吓有機會得到一粒子彈，但畀人圍劈時就焗住只能用一發，所以好多時拎住手槍出來都只係指嚇他人，等佢哋唔好逼近。點解有槍畀你用？《I am Alive》並唔係Will Smith主演的電影《I am Legend》得主角同隻狗，仲有少量幸存者，但亂世下大家都會霸地盤，行近少少都會開槍打你或用刀劈你，所以遇到一個新NPC時要評估怎樣應付，要兜路走、近距離用刀解決佢，抑或拎槍指嚇佢要視乎環境，用錯方法或者唔好彩畀兩人以上圍剿時，幾乎必死無疑，玩落好有挑戰性。主角除咗搵路走同要搵番自己老婆和囡囡外，仲可以接小任務幫助其他落難人士，副線任務雖然唔多，但作為一隻咁平價的新遊戲來說，製作上都算好有誠意！

INFO

類　　型：冒險

開　　發：Ubisoft Shanghai & Darkworks

平　　台：Xbox LIVE ArcadePS Network

推出日期：3月7日（Xbox）；4月（PSN）

售　　價：1,200 MS Point（Xbox）$118（PSN）