《Great Battle Full Blast》高達×鹹蛋×拉打 廿載復活

小時候玩超任的《SD英雄快打》系列，控制Q版鹹蛋超人放死光、拉打風雷電等，邊行邊打低路上的怪物，好玩到經常唔願收機而畀阿媽打。估唔到事隔廿年，「眼鏡廠」竟然推出PSP新作《Great Battle Full Blast》，遊戲收錄了六位新舊英雄，分成「高達」、「鹹蛋超人」、「幪面超人」三組，包括擅長高機動空中戰及全彈發射的自由高達、武器多多攻守兼備的高達、放死光的超人阿鄉、格鬥技豪邁的超人梅比斯、識出風雷電的拉打舊一號，以及能夠幻化成唔同拉打的Decade。遊戲玩法相當簡單，只需緊記敵人與英雄之間的屬性關係，就能事半功倍輕鬆退敵。

合作切換 攻守兼顧

雖然作品貫徹同系列過往的橫向捲軸動作玩法，不過遊戲仍加入不少創新系統，為戰鬥帶來新意。其中的「合作切換」系統，就是透過切換「L」、「R」簡單換人，創造出不同角色連段，或者利用換人時機幫手擋下敵人攻擊，攻守合用。不過使用此系統時會消耗「SP計量表」，玩家需靠命中對手來重新累積。此外，遊戲亦加入援護攻擊系統，三個組別一共36位同伴角色任君選擇，作額外攻擊或回復角色血量等，玩家可在戰前對應不同場合，揀選最多四位心水角色。

INFO

類型：動作

人數：1人

平台：PSP

發行：NAMCO BANDAI Games

日期：3月1日

售價：$6,280

查詢：2770 7702