天字第一號 SR冥王Zeorymer
《冥王計劃Zeorymer》係乜東東？未聽過唔出奇，因為呢套OVA動畫未喺香港播過。其實呢部動畫來頭唔細，原著漫畫由《強殖裝甲加爾巴》嘅高屋良樹操刀，又有麻宮騎亞負責人設，卡士認真犀利！講到玩具，記憶中只有首辦Figure及零散盒玩；等咗廿幾年，終於有超合金推出，仲係標榜造型及可動性都一流嘅SR系列呢！
SR好玩之處，除咗Figure本身質素，好多時仲隨盒跟埋Effect組件，藉此重現動畫中嘅經典場面，SR Zeorymer都唔例外，跟咗一塊「天」字膠片布景，手背亦有「天」字出招Gimmick，咁就可以立體使出必殺技「次元連結系統」啦！
招牌特效組件
講返少少故事背景，《冥王計劃Zeorymer》講述秘密組織「鐵甲龍」嘅科學家木原正樹，為咗實現統治世界成為「冥王」嘅野心，背叛組織投入日本政府，並將自己嘅精神封印喺最強機體「天之志雷馬」，當合適者秋津正人駕駛機體時，就會控制後者嘅人格嚟滅殺敵人。原設機體透過手背及胸口嘅黃色核心，以人工生命體冰室美久作為鎖匙，發動絕招「次元連結系統」，心口會浮現「天」字標記；SR版本就以換件形式喺右手核心插上「天」字特效組件嚟到交代。此外，使出絕招「冥王波」時，又可以喺背後豎起「天」字膠片布景，手背亦可安裝爆發特效組件，跟得相當足。
可動性超班
動畫中嘅Zeorymer，頭頂、背包、肩甲、手臂、腰側統統都有尖角伸出嚟，十足獨角獸上身，SR超合金都唔例外，至於胸口及手背合共三粒嘅透明黃核心組件，就同背包噴射口嘅金色互相呼應。素材方面，前腕、髖位及腳跟關節都用咗Die-cast，就連成塊小腿外甲都係合金件，夠晒硬淨、接地性高。另一方面，由於Zeorymer以格鬥技為主，SR版本嘅四肢相當靈活，手肘及膝蓋都用咗雙關節，腰位同腳掌又用咗Ball Joint，最精彩莫過於膊頭與身軀之間加入兩組Ball Joints，可以擺出雙拳高舉互碰嘅招牌甫士，可惜造型手掌只得拳頭及開掌兩款，限制咗擺甫士嘅多樣性。
查詢：2433 1828（瑞華行） Chimi Morio-AIC
將三個黃色核心擺到近乎水平並排，再將大「天」字背景板放喺身後，就可模擬出「冥王波」甫士。
小心頭頂尖角幾易斷，好在隨盒送多一支後備角。
手背核心有厚薄之分，啟動「次元連結系統」時，就要換厚版核心。
手背換上「爆發Charge」特效組件，就可重現劇中「重力波」嘅震撼甫士。
換上開掌形手掌，就可以扮「龜波氣功」Chok波啦！
膝蓋用咗雙重關節，髖位又夠實淨，甚至硬到向前扭時有少少吃力，不過點都好過SR勇者王變咗軟腳蟹。
膊頭與身體之間加入兩組Ball Joints，大幅增加雙臂嘅可動幅度。
《冥王計劃Zeorymer》原本係一套成人科幻漫畫，至於1988年推出嘅OVA動畫版本就去除「鹹味」。
配件一覽，有齊大小「天」字及重力波Charge Effect特效組件。
