經典再造《Syndicate》翻新戰未來

93年推出的經典PC遊戲《Syndicate》，唔知大家對佢仲有冇印象呢？事隔19年，廠方重新打造新版《Syndicate》，故事主線依舊係由玩家化身特務對抗大集團，但係遊戲類型、角色到玩法就唔同晒，從當年最Hit嘅Tactical Shooting「進化」成第一身射搫玩法！這種改變當然係基於商業考慮，令此作成為玩落極有速度感又夠爽快嘅射擊遊戲，而且仲加入動作元素同未來武器，都玩得過o架！

第一身射擊 大熱玩法

老實講，今時今日再出一隻類近回合式的Tactical Shooting類型遊戲都幾難有市場，轉型到大熱的第一身射擊玩法實在無可厚非；但現時做得出色嘅第一身射擊玩法都相當多，即使挾住「經典」之名，要突出都唔係咁易。所以新版《Syndicate》就邀請「專業」班底來打造遊戲，譬如請來英國科幻作家Richard K. Morgan執筆撰寫故事背景，亦搵嚟三位荷里活二、三線影星Michael Wincott、Brian Cox同Rosario Dawson為遊戲角色配音。至於遊戲故事就設定喺2069年，玩家要扮演Eurocorp財團的特務，在被腐敗大集團壟斷嘅世界中執行各種任務，戰場由國家衝突變成商場之間嘅角力。

植入晶片 逼敵人自殺

故事背景設定在未來是聰明的做法，由武器到系統都可以超乎想像，唔再局限一定要入子彈開槍嘅既定模式。遊戲主角腦中被植入名為DART6的生物晶片，雖然唔會好似《百變星君》咁變馬桶、變牙膏，但就可以減慢時間甚至開啟Hacking機制對抗對手，例如可以令敵人短時間內變節幫你手，或者逼到敵人用手榴彈自殺。遊戲內可使用嘅武器都比較重型，亦可以開啟如「天眼通」模式睇穿牆，以類似熱能掃描器方式睇到對手的位置，並且可用武器直接解決對方，殺得爽快！

節奏感強 玩法有限制

相對其他射擊遊戲而言，本遊戲的節奏算快，一開戰就難有喘息機會，外國有評論仲話《Syndicate》似係兩大射擊系列《Mass Effect》同《Crysis》嘅混合體呢！不過新版本都想保留元祖版本的故事深度，因此比較着重故事發展，所以並無專為連線Deathmatch互殺而設的多人地圖，甚至乎連線模式都只有合作模式可玩，最多可四人連線夾手夾腳擺平敵人完成任務，並有九個協力任務可玩。當然玩開連線開戰嘅射擊迷未必會受落這個設計，但可幸係單人任務種類豐富，並唔係獨沽一味殺殺殺，足可彌補其他不足。

INFO

類 型： 第一身射擊

開 發： Starbreeze Studios/Electronic Arts

平 台： PS3、Xbox 360、PC

推出日期： 已推出

售 價： $429（PS3、Xbox 360）

$340（PC）

查 詢： 3166 6001