強效DC仔手機無得比
手機影相傳相夠方便，影像質素又唔算差，搞到一眾相機廠商擔心大家唔再買DC仔，所以紛紛為DC功能添新意。Sony Cyber-shot DSC-W630輕巧易玩，一拉就可拍360°全景相；Panasonic Lumix DMC-3D1拍到手機做唔到的3D影片同相片；第三代「黑夜之王」Canon PowerShot S100更備F2.0大光圈及DIGIC 5處理器，散景拍攝、影暗位完全無難度，手機影相又邊有得比！
Canon PowerShot S100高ISO低雜訊
新一代「黑夜之王」Canon PowerShot S100，影像質素畀到用家好大信心，尤其係暗位表現，莫講話手機，一般DC都唔係佢對手。S100用上尺寸更大的1/1.7吋CMOS影像感應器，再配合DIGIC 5影像處理器，數據處理速度快之外，雜訊控制方面也表現理想。S100最高可支援ISO 6,400超高感光度，在暗位及黑夜中實試，雜訊明顯較同級機少；ISO 800近乎無雜訊，ISO 1,600下影像雜訊都可接受，加上具有F2.0大光圈，比F2.8光圈可再調快多3級快門速度，夜攝時就有咁易手震。
人像風景表現出色
S100鏡頭有24mm咁Wide，適合影風景相，可將狹窄環境拍攝得廣闊啲。S100功能上更結合專業同玩味設計，可玩魚眼、玩具、模型模式等有趣濾鏡外，更可以調整內置閃燈輸出，以及配備跟G12同級的ND濾鏡等專業功能。如開動ND濾鏡，在大白天都可將快門推慢到1/13秒或更低，實試拍攝海浪拍岸時都可影出如絲順滑的效果。影景靚之外，S100的F2.0大光圈影人像都可以做到極靚的淺景深效果，而且鏡頭分析力強，細緻位都有更佳表現，影像質素抵得上Prosumer級甚至Mirrorless相機！
SPEC
影像感應器：1/1.7吋1,210萬像素CMOS
鏡頭：Canon Zoom Lens 5倍變焦（24-120mm）
顯示屏：3吋46萬像素
體積：98.9×59.8×26.7mm
重量：173g
2012年DC新潮流：Wi-Fi相片分享
手機攝影最方便是可即時Share，今年DC界其中一大潮流是將內置Wi-Fi，可以機過機Share相片外，亦可經Hotspot上載到社交網站，玩法同手機一樣。
Sony Cyber-shot DSC-TX300V
採用非推蓋式及全鏡面設計，外觀高貴，還配備背照式CMOS影像感應器能有效降低影像雜訊，並支援5米防水功能。
SPEC
像素：1,820萬
鏡頭：5倍變焦（26-130mm）
推出日期：預計3月
Samsung WB850F
對應Smart Wi-Fi，可上傳相片至Facebook、Picasa、YouTube及雲端儲存；配備一支23mm Wide的21倍變焦Schneider鏡頭，規格吸引。
SPEC
像素：1,620萬
鏡頭：21倍變焦（23-483mm）
推出日期：預計4月
Canon IXUS 510HS
外型回歸IXUS經典黃金比例，機身還採用輕觸式屏幕，可透過Wi-Fi分享相片，亦能上載到Canon Image Gateway雲端服務儲存。
SPEC
像素：1,010萬
鏡頭：12倍（28-336mm）
推出日期：預計3月
Panasonic LUMIX DMC-3D1 3D雙鏡獨立運作
繼Fujifilm後，Panasonic也推出採用雙鏡頭而又真正能拍攝到3D相片和影片的DC仔。新機3D1設有兩組4倍變焦鏡頭，拍攝3D相片或3D全高清影片一樣掂。屏幕採輕觸式設計，機背還有3D/2D模式選擇掣，可以快速選擇拍3D或2D，不過就算用3D1拍完3D相或3D片都好，機背屏幕只能顯示2D效果，要睇就要駁3D電視。拍2D影片或2D相片時，兩支鏡頭可獨立運作，用一支鏡頭拍片的同時，另一支鏡頭可Zoom in/Zoom out影相；此外，又可用兩支鏡頭影相，一邊Tele一邊Wide，唔需要影完一張再Zoom鏡頭影另一張，相當有創意。觀乎市場上幾無同類型產品可比3D1，惟價錢略高，$5,190其實已可買到部m4/3相機了。
SPEC
影像感應器：1/2.3吋1,210萬像素LiveMOS×2
鏡頭：LUMIX DC VARIO 4倍變焦鏡頭（25-100mm）×2
顯示屏：3.5吋46萬像素輕觸式屏幕
體積：108.0×58.5×24.1mm
重量：171g
Sony Cyber-shot DSC-W630一掃360°全景
Sony Cyber-shot DSC-W630主打輕同平；用上25mm Wide 5倍變焦蔡司鏡頭，更有五色機身可揀。小記試拍，其影像質素雖未及S100般細膩，但增設的特效拍攝模式確實幾好玩，例如有不少新一代DC仔都有的「玩具相機」、「普普風」、「部分色彩」以及「柔和過曝效果」，其中「玩具相機」模式仲可自訂五種色調，但筆者覺得最過癮係一掃全景拍攝模式，有玩過手機全景拍攝App都會發覺駁相效果一般，而W630就可做出令人滿意的全景效果，更可選水平或垂直全景模式。新機亦新增360°一掃全景模式，自轉一圈就可影到靚靚360°全景相！W630拍片模式只支援到720p而非1,080p，但對平價DC仔來說已相當不俗。
SPEC
影像感應器：1/2.3吋1,610萬像素
Super HAD CCD
鏡頭：5倍變焦蔡司鏡頭（25-125mm）
顯示屏：2.7吋23萬像素
體積：91.0×52.2×19.1mm
重量：100g
薄身高倍變焦DC
手機鏡頭冇得Zoom，影相限制較大，這方面DC始終勝一籌。2012年薄身DC鏡頭變焦倍數不斷增高，如Panasonic ZS20在28.2mm薄機身下已提供到20倍變焦。
Panasonic Lumix DMC-ZS20(TZ20)
在CP+相機展中發表的ZS20，是最薄的20倍變焦鏡頭DC，它配備24-480mm鏡頭，機身僅厚28.2mm，還採用3吋輕觸式屏幕，輕巧好用。
SPEC
像素：1,410萬
鏡頭：20倍變焦（24-480mm）
推出日期：預計3月
Nikon CoolPix S9300
Nikon亦乘CP+推出高倍數變焦DC，當中最高階就是這部CoolPix S9300，內置一支25mm Wide 18倍變焦鏡頭，機身厚度亦做到只厚30.6mm。
SPEC
像素：1,600萬
鏡頭：18倍變焦（25-450mm）
推出日期：預計3月
Olympus SZ-14
配備一支25-600mm 24倍變焦鏡頭，夠晒強勁外，亦配備大量Art Filter，更新增拼貼效果；此外還有多向動態防手震功能呢！
SPEC
像素：1,400萬像素
鏡頭：24倍變焦（25-600mm）
推出日期：預計2月底
四防新機
防水DC或三防、四防DC是相機一大優勢，一來普遍手機難以帶落水使用；另外，除非係專業攝影師，否則一般人好少為大機加裝潛水殼，所以今年四防DC繼續有睇頭。
Olympus Tough TG-820
防水達33呎，又有防震、防冰及防撞能力，還升級採用1,200萬像素背照式CMOS來提升影像質素。
SPEC
像素：1,200萬
鏡頭：5倍變焦（28-140mm）
推出日期：預計3月
Pentax Optio WG-2 GPS
防水可達40呎，亦有相當的防撞及防塵能力；新機還加入GPS功能，上山下海影相都可記錄拍攝位置。
SPEC
像素：1,600萬
鏡頭：5倍變焦 （28-140mm）
推出日期：預計3月
Canon PowerShot D20
具備10米防水、1.5米防撞、零下10℃防凍功能，亦加入GPS及58種場景模式，而且在水底低光源下亦能拍攝出色的相片。
SPEC
像素：1,210萬
鏡頭：5倍變焦（28-140mm）
推出日期：預計5月
查詢：（a） 3191 2333（b） 2833 0955（c） 2345 2966
