Android Apps 交友相睇

啱啱過去嘅情人節，各位「光棍一族」係咪得個恨字呢？有人話「緣分天注定」，小記認為事在人為至真！識多啲朋友，就自然有機會發展感情吧！提起交友，當然有Apps幫到手，今次就介紹一啲唔單止有相睇，仲點都傾到兩句嘅「實用」Android Apps畀大家，等大家多個渠道識新朋友。

《微信》搖搖交友

相信唔少人都有玩微博，不過大多數人都當佢好似Facebook咁用嚟分享近況或者追星，對於識新朋友就好似無乜幫助；今次介紹呢個同公司出嘅《微信》就可以即時對話，表面上同MSN差唔多，不過就多好多交友功能，例如好似Line咁搖一搖搵新朋友，而且仲可以直接結識身處同一地區嘅新朋友，要識就梗係識啲就近嘅朋友啦！至少約出街都易啲。

下載費用：免費

《遇見》聊天互動

《遇見》喺多個地區都係名列前茅嘅App，不論係iOS抑或Android都玩到。佢除了有快速定位功能，可以結識身邊嘅人之外，亦有聊天室可以畀一大班人互相結識。而其介面更係咁多個交友App中比較似樣，不過它就同微信一樣有濃厚中國特色，而且識到嘅多數都係內地同胞。

下載費用：免費

《Go朋友》功能強橫

《Go朋友》本身係《Go桌面》嘅其中一個元件，不過功能竟比一般交友Apps仲要齊全，首先佢搵朋友嘅方式係會根據你一開始嘅設定嚟搵，即係你設定好搵女仔就一定唔會搵男仔，再加上可以直接搜尋附近其他都有玩《Go朋友》嘅用家，又可追蹤指定用家嘅近況，就算識唔到，得閒望吓佢啲相都好吖！

下載費用：免費

《SKOUT》iOS起家

《SKOUT》呢個App本身已經喺iOS推出咗一段唔短嘅時間，玩嘅人數都唔少。而呢個App好多功能係要完成某啲任務，先可以賺取點數開啟，例如儲存相片，以及查看瀏覽過你資料的用戶等，以功能嚟講，《SKOUT》可以話係至獨特。

下載費用：免費

《Say Hi》中文溝通

功能同上述幾個Apps大同小異，結識新朋友都係以附近地區為主，亦有語音訊息功能，而且同《SKOUT》一樣有任務做，用加點數嚟啟動「刊登愛秀」、「炸彈訊息」等功能，可以話係《SKOUT》嘅翻版，佢最大賣點就係用中文介面，方便不諳英文嘅玩家。

下載費用：免費