金國藍圖 積極誠信

面對外圍不明朗因素，財政司司長曾俊華在發表《2012-13年度財政預算案》時預期，今年全年本港生產總值實際增長1至3%，低於過去10年的平均增幅。不過，經濟增長放緩未有影響「金國汽車」的擴展藍圖，最近就在告士打道高價租下約3,000平方呎地舖開設陳列室，老闆戴天為（Samuel）充滿信心認為今年本港汽車市場平穩，甚至積極向好，預期對高價汽車銷售影響不大。

個人遊帶旺本港零售業，市道暢旺，但Samuel另有一番見解：「其實個人遊對汽車業界幫助唔算大，汽車唔同名錶、手袋，唔可以即時帶走，遊客多咗，都唔會直接刺激汽車銷量。不過，透過投資移民計劃，居港嘅內地人的確有好高購買力，購入唔少High-end車款，加上本地人嘅整體財富都有所提升，刺激消費意欲，所以預期今年經濟增長即使放緩，對豪車銷情都唔會構成好大影響。最近我們喺灣仔開咗全新陳列室，係一間豪車專門店，單是裝修費已經花咗幾百萬元，佔地約3,000呎，可以同時展出四部車，主打豪華及高價車。」

完善後勤 倍添信心

經營車行超過30年的Samuel在業界頗有名聲，強調做生意要童叟無欺，誠信永遠排在第一位。「喺呢行咁多年，唔少人都同我買過車，正因為向來交易都均均真真，多年嚟累積唔少熟客。試過有客搵我訂車，最後因為原廠延遲咗交車時間，我哋都退番定金畀佢，就算係已經出售嘅汽車，有問題都可以送返嚟修理。銷售行業好講口碑，要得到客人信任，一定要有誠信，仲要提供完善嘅後勤支援，並唔係話賣咗部車畀你就算。」目前，在九龍灣的維修服務中心面積便多達40,000平方呎，而且擁有多台平治、寶馬、保時捷等等品牌的診斷電腦。

返貨更快 設備更齊

香港有不少行貨車行，大部分品牌在港都設有銷售點，平衡進口商還有甚麼優勢？Samuel表示：「金國喺海外有龐大網絡，引進車款速度快，好多時行貨未有，我哋已經賣緊，就算係同步引進，設備都往往比行貨車多，車價亦較便宜，呢啲都係我哋嘅明顯優勢。」金國與客人的關係，其實不只買賣雙方般簡單，在尖沙咀安達中心的陳列室，設有大型休閒娛樂區，會員可在此大談車經、打桌球及享用健身器材，與客人的關係融入生活中，是同行中罕見，當問到是否贊成跨境自駕遊時，Samuel認為概念是好，但實施前必須考慮本港路面及車位能否應付額外入境的車輛使用。