男女求愛大不同

還有兩天就是214情人節，有情人的當然要精心為伴侶安排好節目，沒情人的惟有找班單身朋友開派對，甚至「無眼屎乾淨盲」，留在家中宅一晚，免得看到別人雙雙對對，篤眼篤鼻。每逢佳節，又是大家狂問「為何仍然單身？」、「點先可以識到另一半？」、「究竟我出咗咩問題？」的時候，頭頂一大堆問號，邊個答得到？今次兩位受訪人物─Dating NOW主腦CM和Jolin，正是現代紅娘，專門為單身男女舉辦極速約會活動（Speed Dating），一年多來，親手撮合多對戀人，亦曾見過不少失敗個案，就讓兩位專家替你找出不再單身的良方。

「點解溝唔到女？」、「點解無仔溝？」，呢一切並唔係好似星爺講咁簡單─「溝女嚟講呢兩個字─靚仔」，雖然靚仔靚女拍得成拖的機會大好多，但有時單身一族亦不乏靚仔靚女喎！歸根究柢，港男港女是否真的令人不敢埋身？近年極速約會（Speed Dating）活動愈來愈多，CM及Jolin接觸過不少單身男女，看盡各種男女大不同，大談時下愛情文化之餘，亦分析哪類型的男女最難搞！

記 記者　CM CM Yip J Jolin

擴闊生活圈子

記 現代男女要結識另一半很困難？

CM 其實香港有好多娛樂，要結識朋友唔難，要看是純粹For Fun還是有心揀對象，如果到一些飲嘢的場合，給人感覺較似玩樂型，但若參加Speed Dating這類活動，則表示有心找另一半的機會多一點。

J 要結識朋友其實不難，但是否有所發展則要多方面配合，我認為男仔很多時都先看外貌，年齡都有一定影響；女仔廿幾歲時好多人追，但當到30歲呢個關口，則可能完全唔同，所以女仔到某個年紀會更難結識對象。

記 怎樣看Speed Dating？

CM 這類型活動在外國流行已久，近年本港的需求亦愈來愈大，先不談是否要透過這類活動才能拍拖，起碼有很多平日生活圈子細的人，真心想去結識新朋友的話，也可參加這類型活動。

J 近年參加者以女士為主，始終現今女多男少，男性選擇較多。但仍然有些人未接受到這種模式，覺得好似相親活動，建議膽怯者可以與朋友結伴參加，壯吓膽都好。

記 參加Speed Dating有咩好？

CM 活動類型有很多，例如飯敍、義工服務、雞尾酒會等，讓參加者結識到不同異性之餘，也藉此觀察各人的另一面。好像從義工服務中，可觀察對方是否有愛心、心態夠唔夠積極等，增進彼此溝通和了解。相比平日飲酒、唱K等活動更深入。

J 其實不少人會叫朋友搞派對結識朋友，但約好耐也約不成，費時失事，反而Speed Dating簡單得多，因為大家都知道參加者都是單身，而且是有心拍拖、對感情會較認真。

無要求=有要求

記 現今男女對另一半的要求是否太高？

J 不同人有不同的要求，好似廿幾歲的女士，通常較着重外形，希望識朋友多於揀對象；到了30幾歲，要求會實際一點，例如經濟上希望對方月入跟自己相若，有2萬、3萬元，而且還要溝通得來、不可以肥或禿頭；但可以接受對方結過婚，沒有兒女會更佳，可能她們認為這類型男士會成熟一點。

CM 問參加者有咩要求，好多人初時會話無乜要求，「正常」、「普普通通」呢啲字眼經常出現，但當問到有咩接受唔到時，就愈講愈多。你以為男仔會比較簡單？其實講講吓都好多要求，曾經有客人因為前度女朋友太黐身，希望未來另一半不用經常見面，最好唔好麻煩，但又要溫柔。

J 男仔通常要找一個好「女仔」的女朋友，但實際上都係睇外表，所以在活動中，外表較為出眾的女士通常會得到較多人交換聯絡方法；而女士就較重視經濟能力，又要睇埋溝唔溝通到。

CM 好多男仔冇另一半只因唔肯Make Promise，因為社會環境令結婚變得困難，可能男仔本來好滿意自己的生活，但城市氣氛好實際，又要擔心結婚買樓，為金錢煩惱，結果令雙方都不敢作出承諾。

外形不是一切

記 有沒有成功及失敗的個案分享？

J 其中一對成功的例子，是兩位個性很好的老師，兩人交換聯絡後一拍即合，一個星期左右便開始拍拖。女方參加活動，要求對象身高前必須要180cm或以上，結果男方雖然只是高過女方少少，但因為性格夾得來，最終都能走在一起。我想說的是，即使外形未必合你心意，但若然性格適合，就不要抗拒緣分了。

CM 我分享一個失敗例子：有一對透過Speed Dating而走在一起的男女，後來分開了。原因是女方欺騙了男方。那位男士說，相識初時，男仔28歲，女仔則說自己30歲，男仔心想相差兩年也可以接受到，後來才知她已經34歲，男仔感到很大壓力，擔心拍拖幾年之後，如果兩人分開，就阻礙了對方的將來，結果由好鍾意變成無奈分開。

無心插柳成功配對……Stella & Ryan

二人都是以「陪朋友」之名參加Speed Dating，結果無心插柳的人走在一起。或許上天早有預備，大家在活動上甫見面已經「有啲意思」，深感對方外形樣貌OK，活動後便經大會交換聯絡，之後互傳短訊、傾電話，再相約出街。Stella說：「彼此相處得自然舒服，Ryan的Outlook幾好，而且好細心、夠Gentleman，照顧周到。」而Ryan亦對Stella讚不絕口：「Stella外表討好，相處落大家好夾，我以前的女朋友會吵吵鬧鬧，影響感情，Stella則不會發脾氣，彼此相處好舒服。」二人都認為Speed Dating只是結識朋友的一種方法，不用抱着奇怪的感覺，「而且有驚喜！」二人開心地說。

Speed Dating是……

極速約會最初見於1998年，當時在美國加州一間咖啡館舉行，之後著名電視劇《Sex and the City》也有劇情講述此活動，令其於2000年間迅速發展，成為潮流。香港近年亦愈見流行，形式多為飯敍，參加者在活動中可認識不同的異性，結束前如果雙方都選擇對方而交換聯絡方法，主辦單位便會讓雙方自行發展，如果只有單方面有心，就要「食檸檬」了。

Jolin & CM's Profile

CM原是搞活動高手，一年前認識了中學老師Jolin，兩人均有心為人牽紅線，於是一拍即合，開設Speed Dating公司，成為現代紅娘，替大家千里姻緣一線牽。

Dating Dos & Don't……

很多男女明明有好感，但很快就「無晒下文」，只因約會時錯漏百出。Jolin和CM建議大家赴約時，只需適當地打扮自己，毋須過於誇張，女仔不用太花枝招展，盡量表現斯文大方便可；男仔則切勿不修邊幅，最緊要整齊清潔。Jolin說：「女仔最緊要做自己，試過有參加者誇張得連手機都換埋；其實化淡妝已經可以，只需要比平時打扮多一點，穿對高跟鞋，已讓人感覺舒服。」而CM則認為男仔一定要整齊，讓人覺得他有生活態度，不是過着糜爛的生活，也不要太「頹」。

談吐方面，Jolin認為女仔重視溝通，所以男仔不宜過分幽默，切忌搞「爛Gag」，Jolin自己參加交友活動時，試過有男仔跟她說：「你信不信我是殺手？」這些「笑話」，千萬不能說出口。CM指女仔十分重視第一印象，所以男仔只要表現真誠、主動而不膽怯便可。