Mitsubishi UD8400U 雙燈膽 6,500流明超亮麗

一般家用投影機，亮度只有千多流明，投影百吋螢幕冇問題，但尺寸一超過二百吋，亮度就顯得不夠，畫面四角位變成偏暗。針對此問題，Mitsubishi最新DLP投影機UD8400U就引進雙燈膽系統，將亮度一口氣提升至6,500流明，就算在日光日白作戶外投影都一樣掂。

影音迷要求愈來愈高，以前睇百吋投影螢幕已夠震撼，但今時今日，螢幕尺寸已提升至三百吋。針對這批愛睇大畫面的用家，UD8400U就引進雙燈膽系統，可將亮度提升至6,500流明，再配合0.67吋全高清DMD感光元件，畫面表現既亮麗，又清晰。

足夠投影三百吋畫面

如果投影畫面只有百多吋，投影時又拉盡窗廉防止外來光源影響的話，千多流明亮度已夠用，但如果將投影畫面提升至三百多吋，加上在禮堂、展覽室等遮光設備不足的地方使用，畫面就會顯得偏暗。為避免此情況，UD8400U引進雙燈膽系統，採用一顆燈膽時，亮度已有3,250流明，一般投影絕對能應付，但如要投影三百吋超大畫面時，加上投影環境偏光的話，就可裝置兩顆燈膽，將亮度一口氣提升至6,500流明，就算在大白天的戶外投影，畫面依然亮麗清晰。另外，其靜音散熱風扇操作音量只有28dB，不會打擾到用家煲碟睇戲。

色彩優化電影感強

玩投影機的朋友都應該試過，投影時將亮度調高，無疑是亮麗清晰了，但卻容易令色彩變淡。故此UD8400U引進Brilliant Colour色彩優化技術，令色彩還原得更細緻，就算提高光度，色彩鮮艷度亦不會下降；同時設有標準、劇場、sRGB等播放模式，睇電視時用標準模式，強調色彩自然感；睇戲時用劇場模式，令畫面更富電影菲林感。如投影照片的話，就可用sRGB模式，色彩準確細膩，保證不會偏色。加上設有獨立色彩調校功能，除了傳統的紅、綠、藍外，更能獨立調校黃、洋紅及青色，令畫面色彩更準確細膩，就算影碟稍為偏色，都可以即時調校回正常。

畫質測試

以二百吋螢幕投影《鐵甲奇俠》，用上雙燈膽模式，畫面亮麗清晰，四角位完全不會偏暗，加上奇俠面上的金屬感表現得細緻像真，色彩及質感都極富電影感。

SPEC

感光元件：0.67吋DMD

解像度：1,920×1,200

亮度：6,500流明

對比：2,400:1

螢幕尺寸：40~300吋

體積：19.3×7.9×16.6吋

查詢：2147 0696

模特兒：Irene