《The Darkness II》 魔臂亂舞

稱得上是「主流」的第一身射擊遊戲，只得四、五隻，其他「非主流」的射擊遊戲，就要加入新花款博出位。當中以07年推出，玩黑色漫畫風格嘅《The Darkness》口碑唔錯，普遍權威遊戲網站都評8至9分，全球總銷量亦過百萬套。明天會推出續集《The Darkness II》，由遊戲系統到操控都再變得「黑」啲，雙手開槍之餘亦可操控埋兩條惡魔手臂噬人，血腥及惡心程度加碼奉上，好此道嘅玩家Buy硬！

更黑更血腥

今集延續上集內容，講黑幫主角Jackie Estacado藉着暗藏在體內的黑暗力量為女友報咗被殺之仇，再力抗叔父侵吞黑幫家族生意的故事。如未玩過前集都唔緊要，只要記住主角在黑暗環境中能夠操控黑暗力量就得。遊戲改編自同名黑色漫畫，所以遊戲角色都係以漫畫風格繪製，而且分鏡更有濃烈的黑色電影感，一玩就上癮！但要先旨聲明，細膽嘅玩家未必玩得起《The Darkness II》，想體驗下遊戲有幾黑色、血腥同暴力，可下載試玩版試試，親身體驗畀人釘十字架、餐廳對面個靚女畀子彈打爆頭、自己中槍倒地被拖行，仲要開槍抗敵的驚險任務。

兩隻手臂夠邪惡

跟其他射擊遊戲最唔同嘅地方，係《The Darkness II》可以運用黑暗力量使出邪門招數，唔係只得懶型雙手開槍咁獨沽一味。主角今次能使出「Quad-Wielding」新機制，兩手揸槍之同時，仲可以控制到多兩隻「惡魔手臂」，可以做到砍殺、舉起敵人甚至拋擲動作，加上雙槍攻擊，直情是將第一身射擊遊戲同動作遊戲兩大優點融合，玩法絕對新鮮；攻擊力雖然幾強，但要純熟地操控都要花啲時間適應。仲想出埋其他超能力，好似想使出「Black Hole」招式製造出一個黑洞睇穿牆，就要用Dark Essence先能夠買到。點先可蒐集到Dark Essence？攻擊敵人並取出其心臟就可以增加了，接受得到嘅話仲可以玩食埋「家明」，以增加Dark Essence！

四人模式挑戰平行時空

《The Darkness II》驚險、血腥、恐怖兼而有之，另一抵讚係遊戲電影感極強，鏡頭運用更唔止得眼睛水平視線，好似畀人拖行時，頭會側埋一邊，就連遊戲畫面都會傾斜顯示；自問方向感較差嘅玩家，真係未必應付得到。遊戲主打單人故事模式，但廠商都知得單人模式，玩家一定唔多滿意，所以今集都加多個跟主軸故事平行進行的四人協力「Venedettas」世仇之恨模式，四個玩家可透過操控各自使出黑暗力量的新角色，以合作方式完成多個殺戮任務，絕對係一個Bonus！

INFO

類型：第一身射擊

開發：Digital Extremes / 2K Games

平台：PS3 / Xbox 360 / PC

推出日期：2月10日

售價：$449（PS3）、$419（Xbox 360）、$359（PC）

查詢：2290 933