甜蜜過節 iPhone情人Apps

2月14日情人節就到，相信不少男士都費煞思量如何慶祝，皆因既要買花買禮物，又要想定綿綿情話，少啲心思都怕情人唔滿意。幸好現在有iPhone，由表白、送禮物到烹調燭光晚餐都有Apps幫手，一機在手，幫你愛到白頭！

遙距寄情話《珍愛傳情》 下載費用︰US$0.99

內建110句情話範例，用戶可引用情話，同時亦能自行編輯文字，最後再加入精美背景即可經MMS或Email寄出，情人收到保證冧爆！它同時有七秒錄音告白功能，並附有世界43國「我愛你」的正確發音，不理對方是何國籍都聽得明！

特價買鮮花《情人節優惠》 下載費用︰免費

不知何時開始情人節變了一個高消費節日，想與另一半過得開心之餘又想為荷包慳番少少，一於安裝《情人節優惠》這個App啦！它由HongKongCard.com提供，為用戶搜羅各式情人節購物優惠，包括蛋糕、朱古力、鮮花及情侶Tee等等；折扣由八折起，部分鮮花Box Set更平至五七折，並詳列了優惠細則及使用辦法，等大家留番啲錢食燭光晚餐！

戀愛自拍鏡《Valentine Cam》 下載費用︰免費

情到濃時好多時想玩自拍，但用iPhone預設拍攝程式又冇氣氛；《Valentine Cam》便正正為增添情趣而設，它提供12款相框予大家選擇，自拍時可任意調校相框大細、位置及方向，拍完後更可把相片經Facebook或電郵分享出去，等朋友羨慕一番。程式供免費下載，若支付US$1.99更可增添32款相框，足夠大家大拍特拍。

自煮冧情人《情人節食譜》 下載費用︰免費

情人節少不了跟愛人共晉晚餐，但出去食又貴又多人，自己煮又無從入手。若閣下也有以上煩惱，不妨安裝《情人節食譜》，跟着圖示逐步烹調出蝦沙津、青口薯蓉、忌廉湯、咖喱雞、龍脷卷及果凍等全份情人節套餐。程式還提供各區的燭光晚餐推介，並詳列地址及電話，睇啱即可致電訂枱。

圖案表真情《戀戀Emoji》（初戀Lite版） 下載費用︰免費

談情說愛，卻迷信「心照不宣」，好容易撞板惹誤會。《戀戀Emoji》含有大量有趣Emoji圖案，無論是暗戀、熱戀、單戀、狂戀還是失戀，它都有符號表達，以此寄給情人自然更傳神、更動人。而針對Whatsapp上使用，它更改善了《新春Emoji》時的移位問題，不怕圖案發送時走樣變形。