情濃朱古力甜蜜Apps

踏入2月，戀人們又開始頭痛：到底要送咩情人節禮物才好呢？無論情人有甚麼喜好，相信朱古力都係最穩陣、最大熱的選擇，所以今期筆者就搜羅一啲以朱古力為主題的iOS Apps，既可以搵到最就近朱古力專門店買現成靚靚朱古力，又有可跟住指示自己炮製「Handmade」朱古力的食譜，甚至乎度定個朱古力朝聖之旅都得，情人節冧爆！

Chocolate小型百科全書

這個新推出的朱古力App可以話係小型朱古力百科全書，由富創意的朱古力食譜、令人垂涎欲滴的朱古力靚相，到專家講解朱古力秘密都有，啱晒真正的Choco Lover！此App最正係有製作朱古力的短片畀大家睇，要自己製作都唔使盲摸摸整得唔好啦！《Chocolate》免費下載日期到今年3月底，要Download就把握時機啦！

下載費用：免費

《Chocolate Travel》發燒友朝聖

不少人都嗜食朱古力，唔知大家想唔想去勻世界有名的朱古力店、朱古力博物館或者朱古力節慶？《Chocolate Travel》就係由一個身為朱古力發燒友的資深旅遊記者所寫的App，內容絕對信得過，由比利時朱古力名店到以朱古力作主題包裝的旅程都有推介，睇完為情人安排個朱古力旅程肯定冧到震！

下載費用：US$2.99

《香港朱古力指南》Share賺優惠

香港朱古力名店都唔少，好似Godiva、agnès b. Délices等等，但要你即時諗起最就近的朱古力店喺邊，都未必即刻有頭緒，但用上《香港朱古力指南I Luv Choco!》App一篤就搞掂晒，App內收錄唔少香港朱古力名店的位置地圖同特色款式，方便到爆；更有唔少朱古力店的折扣優惠，篤入App內優惠專頁再揀Share到社交網站就可用到優惠，但要留意這個本地朱古力App的最新Update時間係11年3月，店舖地址同優惠要Check真啲先好！

下載費用：免費

《明治手作Choco Recipe》自製200款朱古力

有乜嘢好得過為情人送朱古力？就係親手為情人做朱古力囉！由可可豆開始製作朱古力固然好難，但由現成朱古力再花心思整成特色「Handmade」朱古力款式就簡單好多，跟住《明治手作Choco Recipe》照整就可以啦，入面更圖文並茂有成200種朱古力菜譜製法，買排Meiji朱古力跟住做就得！App內仲有唔少特別功能，好似有計時器方便整朱古力，另外亦有相機功能可影低靚相，再Share上Facebook、Twitter都得！

下載費用：免費

《WineChoco: Wine and Chocolate Pairing》美酒配朱古力

想玩高品味啲，用美酒配朱古力做禮物？那就可從《WineChoco: Wine and Chocolate Pairing》取經。程式內雖然冇指名道姓要用邊個酒莊名酒配邊種朱古力先至最高貴，但會以每個地區出產的名酒品種作區別，由法國到新世界的佳釀都有，再從中配搭好似黑朱古力、牛奶朱古力、白朱古力等唔同口味，至於點樣揀酒同朱古力就豐儉由人，平有平買，貴有貴送啦！

下載費用：US$0.99