搖滾復興Enterbay 1/6貓王

「Rock 'n' Roll never die！」一套《天與地》，令搖滾精神再度復興，連帶其他搖滾產品也備受關注。Enterbay就揀喺呢個時候推出與壽屋聯手打造嘅限量特別版人偶—Elvis '68 Comeback Special，將「搖滾之父」貓王以1/6姿態還原人間，加上仿真Mic Stand及Amplifier，形神俱備展現出Dr.Dylan所講嘅搖滾精神！

「往事係用嚟回味，唔係用來逃避！」貓王嘅一生就令人傳頌至今。1935年出生、成年後將黑人嘅騷靈音樂（Soul），與白人嘅鄉謠（Country）及福音（Gospel）樂曲相結合，憑一身混血曲風席捲全美，威到14次攞到格林美獎提名。今次為紀念貓王逝世35周年而製作嘅1/6 Figure，係E記與日本玩具大廠壽屋共同炮製，前者負責設計、後者負責包裝發行，並取材自貓王高峰期喺NBC電視台主持嘅特備節目《Elvis》，呢個節目後期被公眾認定為「'68 Comeback Special」，如今成為Figure嘅Boxset名稱。

Chok樣飛機頭

貓王形象深入民心，喺Band友心目中更係神聖而不可侵犯，為免得罪Fans，E記事前做咗大量資料搜集，最後頭雕由造型師Scuderia打造，並由Y.J.Park監修塗裝，且預先做咗多個樣辦畀官方審批。試辦所見，官方明顯比較鍾意貓王以Chok樣示人，五官、輪廓都有不俗嘅神似度，最正係連飛機頭及兩鬢「的水」都跟足真人，唔講仲以為搽咗髮蠟。唯一要彈係頭雕只有一款，實在唔夠喉，加上表情略嫌木口木面，未能充分表達出貓王深入民心嘅招積神態。

仿皮褸扮Rock友

貓王除咗歌聲動人，一身Rockabilly形象亦對後世影響甚深，E記就特製黑皮褸，雖然只係仿真皮，但係質感、光澤都似足真皮材料，最難得係貓王常用嘅黑色手帶及厚底皮鞋，Figure都跟足比例做番出嚟，抵讚！配件方面，有齊麥克風、結他、Mic Stand、Amplifier及仿舞台底座，結他亦依足實物裝咗六條弦線，配合六隻可換手掌，彈Chord都神似過人！素體亦有巧妙之處，跟以往純PVC製品唔同，今次採用咗全新RM5.01素體，心口位有軟皮包裹，模擬出真人胸肌，解鈕爆衫更加Human-being。