雲上旅程：貓生

我非常喜歡貓，但天生對貓有敏感，真諷刺！試過短期養過，長期就受不了。不過經常跟牠們接觸，好像近日幫小舅父餵貓，那黑貓還是相當黐我。有時也會在想，牠們在世，有沒有任何意義呢？

不同的貓有不同心態，有些總不怕悶，在家中走走睡睡，坐在窗前看遠處風景，那大玻璃就是牠們的電視機，有甚麼看甚麼，要求不高；間中天與地出現隻雀，貓界之收視必定飆升！主人對於這種貓來講，可有可無，千祈唔好點我；最緊要定時放貓糧、剷貓屎！其餘時間，請你退下！

另一種貓是另一個極端，非常黐人嗲人，主人一出現就會在旁，就如小狗般，還會不時發出令你腳仔軟的喵喵聲，要你摸牠，尤其貓頸兩邊，一邊享受，一邊咕咕嚕嚕，主人都冧晒！夜晚當然要同主人「上床」，最好你無另一半！還有一種貓，對其貓生是有所要求的，牠有時會嗲你，但一陣就夠了，之後各自做自己嘢，最多你用電腦時，我在後面陪你；其實我在睡覺，你一轉頭，我都會開眼交交戲。你餵我食嘢時，非常開心，間中有新零食，更加開心，唔使日日快餐嘛；不過知你要供樓，都唔介意長期食乾糧。

有時我跑來跑去引你注意，也是希望你陪我玩一陣，真係一陣就夠，因為我都攰呢。不過有時全日唔妥你，你明o架，之前摸過野貓囉！