登高接福 360度全景攝旺氣
初一除了拜年之外,原來在風水角度而言,趁新正頭往高處走,亦有「步步高陞」的意思。今次小記就帶大家去勻全港幾個熱門的「高」地,包括海拔達393米高的天際100、睇盡維港靚景的山頂以及坐熱氣球升空,近距離接收上天的福氣;而且難得居高臨下,仲可以藉此用部手機影番張360。香港和九龍靚景留念,新一年旺氣自然來!
玲玲師傅教路:「高處接福」
祝福語「步步高陞」大家就聽得多,原來喺風水玄學角度,新正頭往高的地方走,行個大運真係有助運勢。麥玲玲師傅指出:「由於高的地方與天空更加接近,可以更容易接收上天的福氣。在玄學角度上,愈是遠離地面,就愈能遠離厄運,並有加強運氣的作用。」師傅補充:「簡單如去玩摩天輪、上山頂都有『步步高陞』的意思,不過當然愈高愈好啦!」
海拔393米睇香港全景
學玲玲師傅話齋,香港最為人熟悉的高地不外乎山頂,唔想過中環搭纜車的話,大可以去位於西九,全港最高、海拔達490米高的環球貿易廣場(ICC)。皆因此處100樓(海拔393米)的觀景台「天際100」,係香港唯一一個地方可以睇盡360。維港兩岸景色。雖然隔住玻璃幕牆,不過居高臨下的景色依然震撼。呢個時候最好就梗係拎部iPhone拍番幅全景相,小記就推介大家《Dermander Panorama》,垂直部手機再慢慢向右移就可以將一幅幅全景靚相影低,仲有水平儀提示,而且連接位仲唔多覺眼添,效果不俗。
《Dermander Panorama》下載費用:$1.99美元
金龍金樹 影出創意
難得上到嚟ICC 100樓,單單一個全港靚景當然唔夠喉;場內有圍繞全個觀景台落地玻璃的千呎金龍、高逾3.5米的巨型金樹、自動旋轉的桃花樹及黃晶算珠的金算盤;最重要是擺設的方位都由麥玲玲及楊天命兩位師傅提供意見,肯定好意頭。擺設既美觀又有吉祥意義,當然不忘要Snap一番,其中入口處的立體金箔金龍頭絕對是留影熱點,大家仲可玩玩新花款,好似《Fun Camera》就可以幫你在相片加上生動特效,如星星、閃光咁,配合生動的金龍頭以及趣怪的表情,就可以影出搞笑的「龍吐珠」效果,話唔定可以沾到龍福。
《Fun Camera》下載費用:免費
INFO
日期:即日起至1月31日
開放時間:上午10時至晚上10時(最後入場時間為晚上9時)
地點:港鐵九龍站環球貿易廣場100樓「天際100香港觀景台」
入場費:成人$125(網上預售)、$150(即場門票);小童(3-11歲)及長者$90(網上預售)、$105(即場門票)(a)
其他過癮App
《BigHead Maker Free》 搞笑大頭
下載費用:免費
新年特別多機會同親戚朋友合照,想加強效果的話,《BigHead Maker Free》應該可以滿足你。此App可以將相片中人物的頭部局部放大,做出大頭的效果,相當過癮;配合內置的Play功能,人物的頭部仲好似識彈出嚟,非常搞笑!
《拜年啦》變身財神
下載費用:免費
財神爺大家喺電視度就見得多,有冇諗過自己都可以扮呢?《拜年啦》是一款專為新年而設的玩相App,內置多款新年配飾如財神帽、揮春、金元寶等等,左拼右貼就可以化身成財神爺!
「高陞」推介
其實大家亦可以走上山頂,甚至坐熱氣球升空,一樣可以收高處接旺氣之效。
Top 1:山頂盧吉道 無遮無掩賞維港
太平山山頂是香港聞名高地,大家上山頂普遍都會坐山頂纜車,然而行上山頂亦非難事。先由香港大學的大學道出發,再沿克頓道上山,全程不用兩公里,就會到克頓道、夏力道和盧吉道的三岔口,夏力道和盧吉道其實是一條圍繞山頂的環形路,行哪一條都可到凌霄閣,最難得是盧吉道有一段山腰棧道,可無遮無掩地飽覽維港景色,可算是全港最靚的維港拍攝取景地。整段環山路程都以平路為主,長約三公里,帶埋一家大細登高行個大運就最好不過了!
拍攝小貼士
日光拍攝下,天空與景物的光暗反差較大;但近年不少手機都加入DC常見的HDR功能,手機會幫你拍下三幅不同曝光的相片,然後再自動組合成為一幅曝光正常的相片,影景必備。
推介機款
要玩HDR,大可選擇新推出的日系機Docomo F-05D。機身除了備有1,310萬像素CMOS外,其HDR功能更分強弱兩個模式,確保相片效果自然。
Top 2:氫氣球 熱鬧飄浮
要升上高空,未必要坐飛機,皆因位於西九龍長廊的DHL香港氫氣球已正式開放。氫氣球旅程為15分鐘,雖然上升至100米的高空遠不及山頂和ICC般高,不過卻有自由自在的飄浮感覺,而且一個氣球最多可乘載30位客人,成班人柴娃娃升空就夠晒熱鬧啦!
INFO
開放時間:上午10時至晚上9時半
地點:西九龍海濱長廊
費用:日間(10:00am-17:45pm)成人$150、小童及長者$75zxa;晚間(18:00pm-21:45pm)成人$200、小童及長者$100(c)
查詢: (a)2613 3888
(b)2374 0618
(c)2559 2944
天際100位於ICC ,有成海拔393米咁高,望番落嚟景物好似模型咁得意。
麥玲玲師傅:「新正頭去高的地方可以加強運氣,最好正月十五之前登高啦!」
《Dermander Panorama》
畫面會有一個類似太極符號提示你相片連接點,記住要垂直手機先影到。
大家可以任意揀選全景角度,玩盡360度都仲得。
《Fun Camera》
內置極多Bling Bling特效,仲可以靠下載不同Apps儲分而獲得更多免費特效。
作品即睇
立體金龍配合閃光特效以及模特兒的誇張表情,效果搞笑!
《BigHead Maker Free》
作品即睇
人頭激大,效果搞笑,仲可以任由你調校放大效果添!
《拜年啦》
作品即睇
加入相框、桃花、財神帽之後,感覺唔同晒,效果都幾自然。
Docomo F-05D $5,980(b)
上升至100米高空,攞晒登高嘅意頭啦!