Open小將 陪車迷過年

農曆年就到，係時候為車廂布置一番，紅色擺設就最應節，喺台灣紅到發紫嘅卡通人物「Open小將」，就推出咗一系列車廂精品，應晒節主打紅色之餘，Open小將又夠晒可愛生鬼，就算過咗農曆年，你都唔捨得拆呀！

1 安全帶套

將呢款Open小將安全帶套扣喺安全帶上面，令車廂生色不少之餘，又可增加舒適度！

2 小型掛物袋

可掛於風口位或者椅背，適合放置手提電話或罐裝飲品，望落當堂企理晒。

3 防滑儲物格

放到紙巾等濕碎雜物，而且底部有防滑功能，就算車上飛鵝山要左傾右拐，都唔會倒瀉籮蟹。

4 波棍及手掣套

一式兩款，有齊波棍頭及手掣套，寒天日子使用，避免直接觸及波棍頭嘅膠面或者金屬面，以免手指食凍柑。

5 座椅頸枕

用法好簡單，只要將橡筋扣喺座椅頭枕上就搞掂，以後坐長途車都唔會咁易頸痛發作啦！

6 座椅背心

增加美觀度之餘，又有防污功能；唔小心整污糟，只需拆除背心落嚟清洗，座椅表面保持完好，唔使下下幫襯汽車美容店咁肉赤。

同場加映：香精

貴氣紅色香精 $60

顏色應節之餘，圓形樽身高貴大方，香沬屬偏淡類別，較易被大眾接受。

骰仔形香精 $39

細細粒嘅骰仔造型夠趣致，不過香味偏濃，接唔接受到就見仁見智。

啤酒杯形香精 $72

如此造型實屬罕有，而且有多款香味選擇，不過記住真身係香精，咪當杯嚟用呀！

Hello Kitty貓頭香精 $85

辟味效果中規中矩，最緊要都係個吉蒂貓頭，畀女朋友見到，實要你放番個喺車廂啦！

便利店紅星

Open小將係由台灣一個便利店集團與日本公司合作設計嘅卡通吉祥物，出生於Open星球、血型屬O、出生日期為7月11日（咁你知係邊間便利店啦）、最鍾意食鳳梨（菠蘿），由於賣相可愛，出道以來深受台灣民眾歡迎。

想了解Open小將多一啲，唔一定要飛去台灣，到佢嘅官網「Open小將之魔法世界」，都可以搵到好多料，網址係www.openopen.com.tw/。

查詢：2392 4244（台日汽車精品）