《Biohazard : Revelations》回歸原點3D新作

N3DS機主下星期又有大作可玩，新一集《Biohazard: Revelations》將會首度在N3DS上現身，Capcom更製作一個全新故事跟全新操作系統，並聲稱是回歸原點的Survival Horror玩法，以驚慄布局和立體畫面嚇你一跳！雖然本作冇行貨返，但照計就唔會炒到好似初出的《MH3G》咁貴，拆幾封利是就買得到喇！P:P:原創故事沉船探險

原創故事沉船探險

《Biohazard : Revelations》以全新系統示人，比起唔少廠商以舊作翻炒再加少少新元素，本作明顯較有誠意，作為機迷畀錢都畀得心甘情願！故事講述2003年保護傘公司被消滅後，對抗全球各地生化恐怖行動的BSAA靚女探員Jill收到同僚Chris失蹤的消息，於是連同BSAA新拍檔Parker一同前往地中海一艘擱淺郵輪上展開偵查。今集遊戲會以Chapter分場形式設計，打完每個Chapter會有精彩動畫畀大家睇，好有睇連續劇嘅感覺。

組裝武器多變化

起初以為N3DS畫面表現會比Console版削好多，但實情卻唔差！原因係廠方今次動用自家的「MT Framework Mobile」引擎開發，可發揮出N3DS圖像的最強威力，加上立體畫面呈現，如果半夜打機都真係邊打邊驚o架！為配合N3DS上下畫面設計，觸控式下畫面會用作顯示地圖以及揀選武器及道具之用，今集組裝武器玩法更層出不窮，可組合武器外，又可加唔同Parts加強能力，仲可配埋小刀等輔助武器，危急時可以保住條命仔。今集現身嘅變種怪物都神高神大，埋身打會好吃虧，只要按「Y」掣係可撞開對手，但用完能量計又要再儲過。

任轉視點互片對戰

新一集有一套名為「Genesis」的掃描系統，可以掃描出敵人的真身之外，連隱藏在黑漆漆環境入面的道具同蛛絲馬迹都走唔出佢法眼。新遊戲系統還有一個特點，就係可畀玩家任意切換第三身或第一身視點，第一身玩就更有立體效果！要用機身右邊四個功能掣捽視點都有啲難搞，但如果上次跟《MH3G》有買埋個右Analog掣擴充底座的話，到《Biohazard : Revelations》時一樣用得番。除單人模式之外，也有雙人Co-op合作模式，用Local Play連線玩又得，連上Internet玩都得，若然嫌唔夠喉仲有互片的雙人對戰「Raid Mode」可玩，內容認真豐富。

INFO

類型：冒險

開發：Capcom

平　　台：N3DS

推出日期：1月26日

售價：約$450

查詢：2359 7998