恭賀新正頭iPhone接福

為慶賀新歲，一眾新年iOS Apps紛紛在AppStore上架，包括過癮的扮財神、有趣的卡通揮春以及推算龍年運程的小貼士，實用與趣味兼備。難得是大部分推介的新年Apps都免費下載，就算唔信風水、命理嘅朋友都不妨一試，話唔定旺氣跟足你一整年呢！

《賣懶SellLazy》現代版賣懶

農曆新年可算是中國人最重視的節日，而且仲有賣懶這傳統習俗。新App顧名思義是幫你戒除過去一年的懶惰惡習，不過就並非傳統「唸唸有辭」的方法，取而代之是打懶兔和撞珠小遊戲的「摩登賣懶」，過癮之餘亦不失勤力的寓意。除了有趣賣懶方法，更提供賣懶典故，順便瞭解新年習俗。

農曆年有放煙花及燒炮仗等慶祝活動，可惜香港多年前已禁止進行這兩項活動。若想重現這個熱鬧情景，就一定要下載《連鎖新年》這隻遊戲。用家只需控制小燭台燒着從天而降的炮仗、煙花和熱氣球，兼且避免各種道具落空即可過關；要留意後期關數會出現冰塊等物件妨礙燭台亮起，想取勝就一定要眼明手快。

踏入2012年壬辰龍年，太歲都隨之而改變，想知道流年運程、有冇犯太歲的話，就一定要參考《2012犯太歲》。新Apps提供不同生肖的來年運程；如碰正犯太歲的話，就會提供簡單的化解方法，來年就可以順順利利啦！

貼揮春是過年必備的家居布置，不過手寫難保存之餘，手字又未必夠靚。《揮春FaiChun 2012》就將傳統的揮春電子化，大家可隨意揀選揮春的背景底紙、祝賀語甚至轉換字體，保證啱你心水！整好作品仲可以透過「面書」、Email向廣大朋友傳遞祝福，肯定全城爆Like！

若嫌傳統揮春太過普通的話，咁就一定要試玩《Joke福U 2》。新App雖然同樣以揮春作為主題，不過將傳統揮春文字部分轉用得意的手繪圖案，效果非常有趣。而且仲將祝賀語分為「個人祝願」、「家宅姻緣」、「財運工作」等類別，選擇多籮籮。

Vincent