有營賀年菜

農曆新年少不免大吃大喝，若然叫大家節制一點，實在是不可能的事，但大多數粵菜都極為油膩，卻又是不爭事實。可以點？當然是精挑健康點、清淡些的菜式囉！像沙田凱悅酒店內的沙田18，其賀年菜便以海鮮為主，龍躉、蟹鉗、帶子、鹿筋，無論選料、烹調方法都低脂、低油，讓大家吃得盡興。

每逢新年，團年飯、開年飯，豐富的一餐接一餐，而且餐餐都是油膩中菜，想唔肥都難。想吃得健康一點，不一定要食齋咁寡，沙田18的新任大廚倪康健師傅便想得周到，炮製出一系列健康又夠意頭的賀年菜，食材以低脂海鮮為主，不似其他肉類般高脂肪，加上做法上偏向燜和蒸，比起煎、炸更輕怡，吃多多都不怕。

低脂鹿筋添惹味

今次的賀年菜由入行30多年、經驗豐富的倪師傅主理，曾到過上海、日本、台灣等地當廚師的倪師傅，諗頭多多，而且講究健康飲食，今次設計的10道菜賀年餐單，用上矜貴龍躉入饌，例如將軟滑背翅炸香後，加入冬菇、火腩、上湯等，做出古法燜龍躉翅，又或是將魚腩部分炒球製成翡翠龍躉球，入口爽嫩鮮味，更有「年年有餘」之意。另外，他又以鹿筋作菜，據說鹿筋的脂肪含量極低，而且膠質豐富，對男女老幼都有一定的滋補作用，而倪師傅特地加入濃烈的黑椒、蒜頭、薑等燜40分鐘，為本來淡而無味的鹿筋添上惹味。

蒸出滑雞鮮味

另外，在烹調方法上亦很講究，有別一般粵菜的油膩做法，倪師傅最愛用清鮮的煮法，絕少炮製煎、炸菜式，加上少油、少鹽，讓客人品嘗最天然的味道，當中的代表作，必數小葱百花蒸釀蟹鉗及荷香金華蒸鮮雞，前者由新鮮海蝦剁成蝦膠，再混合蟹肉包裹蟹鉗去蒸，不似坊間的炸蟹鉗般熱氣油膩，卻又能吃出箇中鮮味；後者則有別於炸子雞，以龍江雞加入花菇、金華火腿等鋪在荷葉上蒸煮，鹹香及清香完全滲透入雞肉內，每口都是鮮味精華。

Shop Info

地　址：沙田澤祥街18號沙田凱悅酒店4樓

電　話：3723 7932

供應期：即日起至2月5日