當堂後生晒 Honda Stepwgn 2.0 SX Dynamic

MPV嘅外觀向來樸實無華，但係本田（Honda）最近就為Stepwgn加入了2.0 SX Dynamic版本，追加頂置尾翼、日版Modulo裙腳及運動化合金輪圈，成個Look當堂後生晒。此外，Stepwgn 2.0 SX Dynamic仲獲認可為環保汽油私家車，可享稅務寬減，代理目前以$299,880開售，包埋天窗、皮椅，Budget唔太多嘅年輕家庭都可輕易上車。

市場有咁多車揀，點解要揀MPV？空間大、載得人多已經係無敵理由啦！Stepwgn採用2+3+3座椅編排，後排可按需要收喺地台底，同時將中排推前，騰出嘅置物空間足夠擺放兩部大型單車。相對歐洲對手，日系MPV嘅設計往往較細心，更符合港人口味，Stepwgn除咗有同級最低嘅390mm低地台，中排仲引入一按式摺合設計，配合獨有嘅一梯級式地台及雙電動趟門，乘客進出車廂更方便，長者及小朋友更加出入平安。

醒目Smart Key開門易

Stepwgn嘅車身長度有4,690mm，但操控及睇位都好容易，最小回旋半徑只有5,300mm，加埋左邊三角窗設有輔助鏡，可以反射左邊車頭嘅盲點位，駛入超窄停車場都冇有怕。此外，相信唔少車主都試過抱住小朋友或大件行李時，冇手（手禁）防盜器嘅不便情況，Stepwgn就加入Smart Key自動感應門鎖，無論將遙控車匙放喺手袋或褲袋，總之貼身就得，只要企喺車旁及輕按門柄上嘅按鍵，兩側電動趟門就會自動打開，夠晒User Friendly。

$1.2/km油費夠划算

揸得MPV，都預咗要載屋企人周圍去，平日要送仔女返學、假日又要去街，如果部車「大食」肯定入油入到窮。今代Stepwgn就搭配咗2.0公升直四i-VTEC引擎，馬力及扭力分別去到150ps及19.7kgm，性能唔算好勁，不過作為家庭車，考慮埋香港嘅路面環境，已經綽綽有餘。同時，引擎導入全新活門操作機制，引擎處於低負荷狀態時，生氣活門會延遲關上，藉此減低耗油量，配合波箱油加熱裝置及「ECON」mode，平均耗油量（以日本10.15行駛模式計算）可低至14.2km/L，計落都只係$1.2/km。

SPEC

車型：五門八座位MPV

引擎：直四i-VTEC

容積：1,997c.c.

最大馬力：150ps/6,200rpm

最大扭力：19.7kgm/4,200rpm

驅動：前置引擎、前輪驅動

傳動：CVT

懸掛：（前）麥花臣 （後）H形扭力桿

制動：（前）透氣碟 （後）實心碟

車身體積：4,690×1,695×1,815mm（長×闊×高）

售價：$299,880

查詢：2827 8622（合群汽車）