先達殺上銅鑼灣 瀛Phone達人月賺8萬

香港人愛玩Phone,人人不是手執iPhone便是HTC、Samsung等Android機。然而,若這樣便認為其他手機冇運行便大錯特錯,例如三禾電氣老闆林振威(Simon,38歲)賣的日本手機就有價有市,不但樣靚芒正,最近更解決了SIM Lock問題。去年底,Simon更將生意由先達擴展至銅鑼灣,開設分店主打中產客,還兼售各式特色機殼。現在,Simon每月淨賺$80,000,為其瀛Phone帝國踏出新一步。

新舖主打中產

旺角先達廣場是手機界聖地,每逢外國有新手機推出,隔日就有水貨在先達湧現。惟近年先達差不多變了iPhone買賣場,人流複雜兼遊客眾多,負面新聞時有聽聞。有見及此,Simon去年12月初便於銅鑼灣富明街開設樓上分店︰「先達冇錯係人流多、位置方便,但太過逼,好多斯文客同OL都唔係咁鍾意,新舖選址銅鑼灣就係希望吸納到呢批中產客人。」記者採訪所見,其新舖的確跟先達一般「舖仔」有天壤之別,除佔地千呎外,全間舖用木地板配襯簡約的紅白兩色裝潢,猶如裏原宿的潮店般。

早着先機賣瀛Phone

三禾電氣於5年前成立,原名「三友電氣」,「三友」指最初的3位發起人,「電氣」在日語中則有電器之意,後來因覺名字太「娘」才正式改名。「香港人崇日,當初我們只做日本電器的批發生意,間中才兼賣日本手機。直至06年日本出了部Vodafone 802SE,由於外形靚仔香港又用到,便膽粗粗嘗試入貨,結果大受歡迎。加上愈來愈多客人要求代購其他型號,我們遂於08年改以手機為主打,並於先達開設首間門市。」小記猶記得當年要玩日本機,唯一方法是到數碼通上台兼出機,奈何選擇不離SH833或SX862等Sharp型號,Simon夠膽引入其他牌子,甚有先見之明。

穿梭港日建立商譽

日本手機一向有班忠實Fans,除因為外形五花八門,影相及屏幕質素佳外,在iPhone、Android成為主流的今天,日本機能畀到用家新鮮感!目前,Simon每月約入200多部手機,貨量比很多行家的總和還要多,「要買日本手機必須在當地上台,外國人根本買唔到,所以開業時僅靠幾個日本朋友幫手入貨,直至後來認識到當地供應商才能大手入貨。」Simon補充,日本人做事謹慎,為了建立信心,一星期要飛日本2次,最癲試過24小時內往返兩地,簡直是體能挑戰。

曾受卡貼解鎖困擾

手機來貨價甚高,Simon單是每月入貨便佔總營業額的8成半以上,七除八扣後平均月賺$80,000,看似好搵,但也經歷過倒蝕的日子。「日本手機設有SIM Lock(網絡鎖),要解鎖就要使用『卡貼』,但不是所有型號都用得到,亦會出現『圈外問題』,即手機訊號一旦中斷便無法自動尋回網絡,要重新開機再搵。」Simon指出,單是向客人解釋以上問題就耗費極多精神、時間,別人賣一部行貨手機只需半小時,他卻需要個半小時或以上。「最慘係避免唔到客人回頭『爆鑊』,遇到這種情況當然要免費搞番掂;加上每部毛利好低,一年前過嘅真係黑暗日子。」

首創Trade-in服務

然而,黑暗過後總見光明,自SoftBank搶得iPhone經營權後,對手DoCoMo為奪回Smartphone市場佔有率,遂於去年4月1日取消旗下手機的SIM Lock限制;自此日本機毋須再解鎖,插卡即用!今天,Simon只集中引入DoCoMo型號,再加上裸眼3D、防水防塵等新噱頭都由日系機帶起,現在終於轉虧為盈。為了留住客人,他提供「7日包換,1年保養」,還創先河地提供日本機Trade-in服務︰「iPhone咁好賣,其中一個原因係有二手市場。若一部機放都冇人要,就算機能幾勁都冇人敢買。我提供Trade-in,等佢哋放機時換埋新機,無形中幫我翻埋單。」

特色機殼擴充客源

手機好賣與否純粹睇樣,因此Simon並非每個型號都入,入貨時還要兼顧本地粉絲喜好,「好似香港人覺得摺機先係日本機,我就入多啲。另外本地高達Fans眾多,我就入過跟盒有埋隻高達模型嘅SoftBank 945SH G。」此外,Simon還積極開拓客源,除了手機,還兼賣日韓牌子的特色機殼,採訪當日就見不少學生妹圍着選購。Simon指,此舉既可幫補收入,同時又增加了接觸客人的機會,「客人買得開心,將來換機時腦海自會閃過『三禾』二字。」可見他確懂銷售之道。

營業資料

總營業額:$1,200,000

租  金:$50,000

入  貨:$1,030,000

人  工:$32,000

雜  費:$8,000

盈  利:$80,000

Gilbert

Simon於去年底租下銅鑼灣新舖,希望吸納一班先達以外的中產客。