《Gran Turismo 5 Spec II》 誠意更新

吓！出咗新版本《GT》？大家冷靜啲，即將推出嘅其實係年多前《Gran Turismo 5》的更新版，要等新一集怕且都要到PS4先有！這個新《Gran Turismo 5 Spec II》比起一般「The Best」版（即舊Game換封面再平價推出市場）來得有誠意，在原有遊戲外，再加入三個月前推出的Spec 2.0更新版以及夾夾埋埋要成$125的DLC內容，現在$298就有交易，未入手《GT5》的玩家，都值得買套看門口！

更新檔及DLC內容大合輯

《Gran Turismo 5》開發經年，而且對應3D顯示，實屬大作，初代於上年11月推出。不過機迷應會諒解「GT之父」山內一典着重細緻度多於一切，無三、五年都唔肯推出新一集，在空檔時期唯有推出更新版或其他版本來延續產品可玩性。新版本《Gran Turismo 5 Spec II》就係一個例子，今集收錄咗之前10月廠方為《GT5》所設計的Spec 2.0免費更新檔案，以及「賽道下載包」、「賽車下載包」、「賽車下載包2」、「賽車裝備包」及「上色道具包」多個DLC內容，之前要買齊這幾個DLC就要畀$125，今次就跟《GT5 Spec II》一次過推出，價錢方面都幾抵。

車廂視點有新意

咁Spec 2.0更新檔案同原版有幾大分別呢？Spec 2.0更新檔案涵蓋面都幾廣，雖然唔算得上係好厲害的更新，但玩落都有不少新鮮感。譬如全部800款標準車都支援簡易版駕駛座視點，雖然儀錶板設計以至車廂內櫳都未必跟足真車，但鬥車途中按Select掣轉下視點就冇咁悶。部分賽道在更新版中更可以畀大家在競賽模式下，揀選唔同天氣和時間，重玩都仲有新鮮感。《GT5》其中一個最好玩嘅地方，係可以揸架靚車到唔同景點影相留念，更新版就新增「Indy NASCAR維修站」場景，另外亦新增個人車手造型顯示同隱藏功能，可以換上烈火戰衣Chok定樣影靚相！

收錄「GT之父」得獎戰車

至於之前要收錢嘅DLC部分，唔使講都有好多新車同新賽道畀你玩，當中就收錄了超級跑車Red Bull X2010的進化型號X2011，另外亦有提升咗馬力嘅R35 GT-R 2012年款Black Edition等，都有成19部。其實經由Spec 2.0新增嘅戰車仲有多11架NASCAR車款，甚至乎「GT之父」去年參加德國紐堡林24小時耐力賽賽車，獲得分組優勝時所駕駛的戰車Nissan GT-R N24 Schulze Motorsport'11都有收錄，甚有紀念價值。新增道具內容亦相當豐富，由WRC、NASCAR著名車手的頭盔同戰衣，到最新Gran Turismo官方頭盔、Alpinestars同SIMPSON品牌的新道具都有，換套靚衫落場鬥車就更加醒神！

SPEC

類型：賽車模擬

開發：Polyphonic Digital

平台：PS3

推出日期：1月10日

售價：$298

查詢：2341 2356