情人節早有預謀 提早配色

今次介紹嘅足球鞋及籃球鞋，都係男裝款式，不過本文係寫畀廣大嘅女生睇！相信唔使提你哋，已經高度期待愈嚟愈近嘅「2．14」，估緊男友Book邊度撐枱腳及送咩畀你之餘，你又係唔係要有番些少準備呢？adidas嘅mi adidas服務就可以畀你發揮創意，配搭出最有個人風格嘅鞋款及服飾，最近仲加入咗adizero F50足球鞋及adizero Crazy Light籃球鞋，若然BF正係其中一瓣，甚至兩樣都啱嘅運動健將，今年嘅情人節禮物就唔使諗餐死啦！

依家就要決定BF份情人節禮物？似乎早咗啲喎！幫襯mi adidas就唔係咁講法，事關對鞋係照足你意思特製而成，你估唔使時間做咩，所以提早一個月落Order就最穩陣，尖沙咀漢口道嘅旗艦店就有mi adidas服務提供，只此一家咪去錯。

adizero F50　逾40款隊徽任揀

講番正題，新加盟mi adidas嘅adizero F50足球鞋屬於FG版本，如果男友平時踢開真草場就啱晒。正如上月推出嘅adizero F50 Powered by miCoach一樣，mi版鞋身都有齊Sprintweb、Sprintskin及Sprintframe等功能設計，亦都對應miCoach Football應用程式，不過miCoach Speed Cell就要另購。至於mi adidas嘅特色就係鞋身顏色可以自由配搭，甚至加入心水細節位，mi版adizero F50嘅鞋面就有13種顏色任揀，想玩淨色或者撞色都得，除此之外，鞋領可以繡上最多10個字母或數字，踭位仲多Gimmick，可以喺超過40款國旗及球會徽章之中任擇其一，唔想印錯，記住事先打探清楚男友鍾意邊隊波喇。

adizero Crazy Light　誠意推介玩撞色

男友係籃球迷嘅話，就可以揀adizero Crazy Light，呢款用咗Sprintweb技術嘅新鞋款，淨重只有9.8安士左右，分分鐘輕過拖鞋。至於mi版嘅鞋面顏色選擇多達14種；既然早前嘅聖誕特別版玩咗淨色設計，個人認為今次幫襯mi版嘅話梗係要玩盡佢、玩撞色啦！除此之外，踭位兩側嘅中底位置，可以加上字母及數字，至於鞋舌亦可加印31隊NBA球隊會徽嘅其中一款，或者NBA官方Logo，BF球迷收到一定Happy到痹。睇到呢度，妳仲唔嗱嗱聲Check清楚男友着幾多號鞋、追開邊隊NBA球隊！

查詢：2730 0157（adidas HK）