《為食寵物街》港產Cafe World

雖然現在Facebook Games已經無兩三年前咁流行，但今次介紹這個由本地遊戲開發公司Gamespace開發的Facebook遊戲《為食寵物街》就值得大家支持一下！遊戲內容雖然有啲熟口熟面，但勝在玩法簡單，兼且加入唔少香港特色食物，過下日辰都玩得過。

營運寵物甜品餐館

《為食寵物街》在剛過去的亞洲遊戲展中首度公開兼公測，以可愛逗趣的角色同簡單玩法作招徠，都吸引到唔少女性玩家。遊戲玩法係你要經營一家專為寵物而設的甜品餐館，由店面裝飾、招募員工、設計新甜品款式到營運餐館都要搞，玩法跟《Restaurant City》、《Cafe World》接近，但《為食寵物街》玩法更簡單，並唔需要自行烹調食物，唔使成日提心吊膽驚食物煮燶，甚至乎可以交由電腦託管呢。

地道美食登場

遊戲強調係完全由香港開發，所見嘅甜品款式、交通工具到地區場景都好有香港特色，像有蛋撻、哈密瓜刨冰同三色雪糕球甜品；而場景方面會提供香港、雲南、南極、撒哈拉沙漠同亞馬遜森林等。由於現時只屬公測階段，只提供到香港場景，但玩家照樣可悉心地將餐館布置得美輪美奐。玩法方面，只需放食物在地板上，然後點選寵物再點選該食物即可，不過較麻煩是需要再按店員補充食物；惟要留意寵物會因等得唔耐煩而撒野，唔覺意仲會留低腳印或便便，那就要多花時間執拾。

Facebook網址：http://apps.facebook.com/hungrypet