SR Solar Aquarion 串燒無限拳
根據瑪雅曆法預言，2012年正係一個時代嘅終結，筆者忽發奇想，咁係唔係意味失落文明將會因此復興？喺《創聖之Aquarion》故事中，南極融冰喚醒消失咗一萬二千年嘅遠古文明，仲令到有翼生物「墜天翅」復活向人類大開殺戒，好在人類識得以「創聖之書」技術製造出Aquarion對抗，先唔使絕種咋！SR超合金就啱啱出咗主角阿波羅所駕駛嘅Solar Aquarion，當中豪邁嘅必殺技「無限拳」，可透過Ball Joint部件「串燒」而成，夠Gimmick！
由Vector Sola、Vector Luna及Vector Mars三部超戰機合體而成嘅Aquarion，當中嘅Solar Aquarion係三者之中攻擊力最強，雖然SR版本玩唔到合體分離，但係都將拳頭無限伸長、將敵人由地球打到上月球表面嘅絕招無限拳重現出嚟，只要拆走右手拳頭，接上四組Ball Joint延伸手腕部件，最後裝埋大拳頭就成事。隨後仲有太陽劍一把，即使劍身唔係電鍍炮製，但係金色位都頗具質感，擺出劍甫士都幾神似。
電鍍背翼夠搶鏡
除咗有出招Gimmick，Solar Aquarion嘅上色塗裝及轉印技巧都做得唔錯，例如胸口嘅羽翼水印標誌及雙肩嘅三叉戟圖案拉花都冇出界，而且由Vector Mars構成嘅背翼，上下掀起後，內裏嘅環形圖案統統用電鍍處理，夠氣勢！至於合金分量方面，包括肩膊關節及腰腹嘅連接位，下半身嘅髖關節、足踝Ball Joint及小腿外甲，整體唔算墜手，不過主要關節位都可以長時間保持硬淨，可惜背翼支架關節冇用到合金，感覺唔多穩陣，加上腳掌受力位只係ABS塑料製造，淨係靠合金足踝嘅Ball Joint嚟支撐全部機，有啲化學囉！
查詢：2433 1828（瑞華行）
SR超合金《創聖之Aquarion》——Solar Aquarion
建議零售價：$489
配件針對無限拳及太陽劍而製成，選項唔算多。
起腳「挫膝」、金雞獨立都做到，可想而知關節夠穩陣。
隨盒有埋太陽劍，可以擺出多種優雅劍招。
整個髖關節都用合金炮製，扭動時夠實淨。
手肘只有單關節，活動幅度大受限制。
面相雕功精細，肩位拉花及心口水印嘅QC都做得唔錯。
上下掀起背翼後，就會見到電鍍處理嘅環形圖案。
小腿外甲及足踝關節都用合金製造，增加接地效果
無限拳特效配件又長又重，少不免要用支架撐住。