Hisense 55" 3D TV　立體流暢無閃爍

人有死穴，電視都一樣，主動式快門3D TV雖然能用盡1,080p解像度，畫質細膩清晰，但須透過快門高速開關來營造3D立體感，容易引起閃爍，睇到眼都花。針對此問題，Hisense最新55吋3D TV LTDN55XT710HK3D就引進最新3D-SOC影像處理技術，配合120Hz不閃式3D屏幕，能有效減少閃爍，睇足成套3D版《阿凡達》都同樣流暢順眼，同時支援Wi-Fi上網，能直接收睇Youtube、優酷，玩Facebook、微博都無問題。

因為不喜歡閃爍問題，有部分影音迷寧願選擇被動式偏光3D TV。無錯，被動式確能趕絕閃爍，但顯示3D畫面時只得720p解像度，畫質細膩感明顯比下去。如想兩全其美，既有畫質又冇閃爍，便不如考慮這款LTDN55XT710HK3D。雖是55吋大尺寸旗艦級型號，但售價亦不過二萬元，適合預算不多，但對畫質有要求的影音迷。

採用不閃式3D屏幕

為何睇主動式快門3D TV時容易出現閃爍問題？那就先要說回3D顯影原理。簡單來說，就是透過3D眼鏡左右快門的高速開關，令左右眼睇到不同視差的畫面，從而營造出3D效果，但如果環境太光，特別是開了光管的話，就容易出現閃爍睇到眼都花。故此LTDN55XT710HK3D就引進最新3D-SOC影像處理技術，能分析左右視差畫面，進行綜合處理，令兩者配合得更流暢自然。加上新一代快門技術及120Hz不閃式3D屏幕，便能有效減少閃爍、抖動及重影問題，就算長時間觀賞3D電影，都同樣流暢順眼。同時針對透過3D眼鏡睇戲時，畫面容易顯得偏暗的弊病，此3D TV將亮度提升至550流明，配合1,000,000:1對比度，畫面明亮清晰之餘，暗位層次感仍細膩分明，暗位夠深黑，不會因高亮度而淡化。

Wi-Fi上網瀏覽網頁

如煲碟追劇睇到悶悶哋，LTDN55XT710HK3D亦支援以Android平台為基礎的網絡功能，可選擇透過LAN線接駁或Wi-Fi上網，直接輸入網址瀏覽網頁，便可睇Youtube、優酷內的短片，就算玩Facebook、上微博與朋友溝通、進入雅虎、Google翻查資料都無問題；同時備有大量應用程式供下載，包括遊戲、資訊及短片收睇等等。如嫌透過屏幕鍵盤輸入不就手的話，亦可接駁無線鍵盤及滑鼠，那就能更簡單快捷地輸入心水網址，唯一美中不足是不可透過2D轉3D功能來觀賞3D版的Youtube短片，但兼容性之強，已是同級電視中數一數二。

收睇3D版RMVB短片

RMVB是現時網絡最流行的短片格式，不少人都喜歡閒時以電腦下載心水RMVB短片欣賞，但用十幾吋電腦芒仔睇實在太辛苦，故LTDN55XT710HK3D就支援透過USB直播RMVB短片。同時針對3D藍光碟選擇偏少的問題，大家更能以2D轉3D功能，將RMVB短片全面3D化，令睇片選擇大增；就連電視節目、DVD、甚至打機畫面也可2D轉3D，實行全面3D化。3D化的同時，亦能因應片種而調節視點及景深，例如將景深調深，立體感就會更強，但這樣卻較易睇到眼花，用家可因應個人適應能力而選擇。

3D畫質測試

試播一段3D電腦動畫片段，海龜與背景的3D層次感細膩分明，更難得是主動式電視常見的閃爍問題一掃而空，畫質由始至終都保持流暢自然。而且陰影暗位深黑得來富層次，高對比度應記一功。

SPEC

尺寸：55吋

解像度：1,920×1,080

亮度：550流明

對比度：1,000,000:1

反應時間：6ms

體積：1,267×768×38mm

重量：23kg

查詢：2481 1175

模特兒：Debby（Pure Models）