小惠惠孖刀滅小強
對於日本人嘅古怪創意，真係唔到你唔服，明明一套搞爛Gag嘅短篇殺蟲漫畫，都可以登上電視螢幕，化身OVA短片人物及Console遊戲角色，近年仲成為人氣爆燈嘅Figure常客，壽屋模型及Bandai超合金都要預埋佢一份，咪就係《一擊殺虫》囉！喺新近上架嘅超合金「一擊殺虫!!小惠惠重裝Set」裏面，小惠惠為咗全人類嘅福祉，增強火力殲滅害蟲，激光槍、火箭炮樣樣齊，連銘刀「十六夜」都玩埋雙刀流，小強見到仲唔退避三舍！
故事中小強已經無懼任何殺蟲劑，仲大量繁殖，直接影響人類存亡；有見及此日本企業「MARS製藥」決定開發超小型驅蟲機械人「小惠惠」，對付潛伏喺廚房嘅兇悍敵人。今次嘅超合金套裝就有更強勁武器，比起今年五月推出嘅基本Boxset好玩得多，由單笥式榴彈槍、重機槍、變成類似《捉鬼敢死隊》嘅背包式雷射兵器，以及雙筒火箭炮統統有齊，最吸引係專為斬殺身手敏捷嘅小強而設嘅銘刀「十六夜」，重要打孖上，夠晒英！
轉眼Gimmick物盡其用
今次小惠惠嘅骨架造型，跟普通版大致相同，只係髮型變咗做孖辮Look，以及頭髮與僕人服嘅配色，改成童話故事常見嘅淺黃及粉藍色，萌味更濃。關節方面，可動性充滿驚喜，其中膊頭、頭、頸都有Ball Joint，可以縮頸及聳肩；手腕及足踝亦加入雙重關節，做到上下左右獨立扭動。此外，僕人服嘅圍裙、傘裙、內襯、「小可愛」全部都係分件裝嵌，就算腰部有大大粒Ball Joint，都唔會畀衣裙阻住活動。不過要數最過癮嘅地方，都係拆下頭頂蝴蝶結嘅榫柱，再揭開後尾枕，就可以利用榫柱嚟轉動眼珠，都幾識物盡其用喎。
查詢：2148 9483（精品）
超合金《一擊殺虫!!》HOIHOI-SAN 重裝Set 售價：$578
雙筒火箭炮有Ball Joint關節，能夠獨立多角度轉動。
背包式雷射兵器破壞力驚人，係小惠惠嘅殺着之一。
隨盒附上專用台座，可以將所有武器穩妥安置。
眼仔睩睩表情多，可惜雙眼只可同步移動，又冇得向上望。
造型手掌有四款之多，以便擺出多款造型甫士。
裙子作前後分件處理，令身體前後屈曲時無阻可動性。
僕人服有獨立內襯跟「小可愛」，分件夠精細。
拆下頭頂蝴蝶結榫柱，再揭開後尾枕，就可以用榫柱嚟轉動眼珠。
拆低背包武器，再除埋白靴，就變成輕裝上陣。