《型可塑2》 假日喪跳Keep Fit
開Party食聖誕大餐都係指定嘅過節動作，但係今個聖誕假連放四日，日日飲飽食醉，好易過節後變晒肥仔肥女。只要大家勤啲玩這隻新出的Kinect體感Keep Fit遊戲《型可塑2》（《Your Shape: Fitness Evolved 2012》），內置跳舞、跳繩、跑馬拉松等多個Exercise，咁 就可消耗假日暴食得來的卡路里，仲可以想Keep邊Part就練邊Part，平日無時間落Gym就要Keep住操喇！
五種舞步任玩
第一集Kinect遊戲《型可塑》曾獲不少好評，遊戲採用革命性Player Projection投影方法，將玩家身體投落在畫面之上，周圍環境更會因為訓練效果而演變。不過第一集遊戲除了一啲基本鍛煉動作之外，另外加入嘅瑜伽、太極等練習動作，就較為靜態；《型可塑2》就唔同晒，今集主打賣點係跳舞Keep Fit，又好玩又有效，遊戲內共收錄五種舞步畀大家玩，爵士舞、流行舞、拉丁舞都比較大路，想搞鬼啲可以跳埋非洲舞甚至係寶萊塢（Bollywood），開Party玩就更有Fun！
虛擬紐約馬拉松
《型可塑2》另一有趣玩法，係收錄了「跑世界」模式，亦即係跑步！大家可能會問跑步有幾特別呢？去Gym都有機跑啦！查實這款體感遊戲的「跑世界」模式（Run the World）有趣之處係加入虛擬風景設計，明明在客廳跑步，畫面所見嘅卻係世界大城市的街景同地標，跑步兼睇風景。遊戲收錄了紐約、巴黎同倫敦三大名城的虛擬街景，當然描繪風格仍係一如主畫面的投影式風格，去唔成紐約跑馬拉松，都可以在遊戲入面滿足心願。在跳舞同在大城市跑步之外，遊戲亦收錄咗唔少強度訓練，如Push-up、Sit-up、跳繩或者如軍訓的Bootcamp模式，想練肌肉都得。
專業教練即時糾正
做Gym最怕係姿勢錯誤令自己受傷，尤其係玩體感鍛煉遊戲時，大家都可能會以Hea玩的心情對待，更易導致受傷。於是，今集《型可塑2》就強化遊戲辨析度，能夠完全將玩家的全身投影到遊戲之中，甚至乎在地板上做Sit-up、Push-up的動作都能夠細緻地呈現，只要有少少動作做錯咗，遊戲畫面上的專業健身教練就會即時提出糾正，認真程度確實幾抵讚。
今集遊戲還新增指定部位Keep Fit玩法，例如想揀「纖腰」模式，系統就會幫你度出一系列運動餐單，照住做就可以想減邊就減邊，但遊戲內只針對軀體同四肢，如果想減包包面就冇辦法了。上一代中文版遊戲唔能夠支援DLC，但到《型可塑2》就可以，預計一月初就會推出新跳繩模式以及四周減肥計劃兩套DLC，追加DLC亦陸續有來，咁就玩足成年都唔怕悶！
INFO
類型：體感運動
開發：Ubisoft Montreal
平台：Xbox 360 Kinect
開賣日期：已推出
售價：$299
查詢：2418 8896
玩得耐，場景仲識Upgrade，跳Bollywood「開心舞」都精神過人。
此作還加入了武術動作，都幾有上集瑜伽、太極的影子。
「Bootcamp」模式好似玩緊軍訓，為高強度訓練模式。
遊戲終歸係遊戲，除正統鍛煉模式外，還有唔少Mini Games可玩。
「跑世界」模式可以畀玩家跑盡紐約、巴黎同倫敦著名地標。
