EB 1/6 Jack Sparrow篤背脊講嘢

Enterbay跟Hot Toys都係本地知名Figure廠，但以往由於取材唔同，直接競爭唔算多。然而自《教父》之後，兩者競爭日趨白熱化，李小龍、Luke Skywalker不斷撞Project，最新戰場輪到《魔盜王》Jack Sparrow；跟HT玩雙頭雕、巨型地台唔同，EB今次連聲都玩埋，撳吓背脊，就會播出13句真人對白，Depp迷可以攬住聽餐飽。

以前EB主打李小龍及華語電影角色，但自從夥拍日本Medicom推出Ulimate Unison系列後，製作經典電影角色再非HT專利，繼星戰Luke Skywalker後，UU系列第四款產品就係《Pirates of the Caribbean : On Stranger Tides》嘅Jack Sparrow。同以往嘅合作形式相同，Medicom主要負責戲服、配件，EB主攻頭雕及素體部分，兩者由洽談到量產用咗半年時間，證明磨合得愈嚟愈成熟。

陰陰嘴笑有新意

由本月嘅《Scarface》開始，EB唔再接零售預訂，改為喺正式供貨前三日通知會員，Jack Sparrow亦沿用此法，以免就試辦及正式推出時細節有別而造成無謂爭拗，咁做法，量產版本自然要有更高質素。由韓籍大師Y.J.Park負責嘅頭雕確係神似，用咗全新嘅多層塗裝技術，毛孔、疤痕都幾可亂真；神態方面，右邊面戚起嘅奸笑Look，與正面及側面都截然不同，亦比常見嘅木獨Look有新意得多，不過顴骨位似乎誇咗少少，令整體面相未夠自然。

13句真人發聲對白

Johnny Depp身材瘦削，為咗令Figure更加Human-Being，EB特別開發全新嘅RAH301kai素體，除咗身形較Slim、又有超過30個可動關節外，更出位係有埋真人發聲功能，玩家只要撳一撳背脊嘅發聲掣，就會播出13句戲內嘅經典對白，例如「There should be a captain in there somewhere！」等，過癮！服飾方面，一向係M記嘅弱項，不過今次大突破，船長帽、襯衫、背心、圍巾及PVC靴都用咗唔同物料製成，甚至係聖餐杯、黑珍珠瓶以至瓶內嘅黑珍珠號都跟足比例製成，比對手更多嘢玩。