ToNick夠膽死，你咪理！

「This city is dying, you know ?」

在這個不用憂柴憂米的年代，能夠讓年輕人熱血的理由似乎冇乜，但更可怕的是，能令他們好奇的事物更少，是時代不鼓勵創意？還是過於安逸扼殺了好奇心？小記無意下註腳，諺語話：「好奇殺死貓」，其實不好奇才殺死人；無好奇心自然無創意，無創意的人生又點會好玩？80後獨立樂隊ToNick，熱血兼大無畏，無聊又夠膽死，沒怨天怨地怨無出路，只因知道有創意又有Guts，即使No Budget仍然可以Creative，正如主音阿恒說：「冇嘢係做唔到，只要你好想做，冇十成都做到八成！」

「Yes, I know, this city is dying, dead......and reborn someday, maybe !」

四子相識於Poly Muso，組成Punk Pop獨立樂隊ToNick，曲風澎湃，歌詞抵死；作為Band Show的常客，演出亦Energetic，他們對音樂的熱情及創意表演獲得音樂監製趙增熹賞識，收歸旗下。去年推出首張專輯《Let's Go》，今年接力推《Round 2》，目標是一年一碟。

不熟悉ToNick的朋友，不妨先聽他們的歌，易入耳又不是一味無因由地憤怒咆哮，細睇歌詞仲可以𦧲吓添！這支Punk Pop獨立樂隊是由阿恒（主音\結他手）、小龜（結他手）、Ryan（低音結他手）及晨曦（鼓手）四子組成，樂隊名字意為「To+Nick」，即指用音樂記下一些事情，他們就讀理工大學時組成這隊Band，一夾就夾了近6年。

幾窮都要夾Band

晨曦笑謂，讀中學時覺得謝霆鋒彈結他好型，又被迷上日本樂隊的同學拉攏夾Band，獲委派做鼓手，「嗰時有朋友學結他，拉埋我夾Band，是但掟個Post畀我，咪學打鼓囉！如果有得揀，梗係彈結他同唱歌型啲啦！」原來主音阿恒正是嗰啲畀Post朋友的人，「嗰時冇Facebook、YouTube，最多得ICQ，冇乜好做，但彈結他就玩足成日，租Band房每人幾十蚊都好『甘』㗎，夾到首歌再錄低，就好興奮㗎喇！」

直到讀大學，兩人夾Band熱情未退，雖然荷包乾塘依舊，但窮途才見出路，當時晨曦在屯門有固定Band房，他們放學就揸「錢七」去夾Band。小龜說：「我同阿恒揸車，但成日冇油，驚死返唔到屋企，咪每人夾幾十蚊入油囉，真係好窮，但係又開心喎。」Ryan補充：「成日夾到凌晨3、4點，但第二朝返『八半』，之後又山長水遠入屯門夾Band！」直至後期，ToNick成形，參加UMC音樂節奪得總冠軍及最佳創意獎，才正式簽約趙增熹。

逼入險境 激發創意

雖然簽了合約，但資源仍然匱乏，要宣傳只好食腦。有在YouTube看過他們MV及短片的人，都覺得他們黐線，為了在TVB曝光，竟在《香港早晨》交通報道的直播鏡頭前，舉起樂隊Banner，成功博得唔夠兩秒的亮相機會，無聊，但好笑。冇Budget拍MV，於是又拎起結他在港鐵行人電梯、星光大道夾Band，惹來「實Q」驅趕，但勝在有Guts，自娛又過癮；為宣傳Band Show，玩起大懲罰，輸咗在維港跳海，有人笑他們黐線，但又笑得開心，完全表現出「No budget but creative」的瘋狂。

永遠看來最冷靜的晨曦說：「係黐線，但好玩喎！你要逼自己去危險地方，先會諗到嘢，人係好衰㗎，太平淡會覺得悶，太危險又會驚，就要响兩端不斷循環，先知好多嘢原來係得㗎喎！」

他們都覺得沒有甚麼是不可能的，阿恒說：「我哋冇乜好怕，亦冇咩做唔到，只要你好想去做，最後冇十成，都有八成。最得意係再諗番轉頭，你會好奇怪自己點解咁厲害，再諗深一層，咪就係因為好想做囉！」正因為大無畏，就算最初出Show冇Say，被老點到上水神功戲棚夾Band，台前陳師傅喉頭頂槍，台下無人聽唱歌，他們仍然興奮，「正常係會講粗口，但咁嘅Job都畀我哋接到，都幾勁！」EQ夠高，又得咗！

歌詞「樂」與「怒」

ToNick好笑的，還有他們的歌詞，像網上點擊率接近80萬的《Last Christmas》，講述聖誕節兄弟借錢不還，還慘被撬牆腳，做兄弟兩肋插刀，誰知卻是「刀裏得我去，火裏得我去」，笑中有淚；而看似情歌的《三幅被》堆砌「我需要你，我鍾意你」等陳腔濫調，卻是寸盡失戀者唱情歌自頹。歌詞題材多樣化，抵死過癮卻是要旨，就算對現實不滿，也用輕鬆幽默表達。

阿恒說：「歌詞係我哋嘅經歷，依家好興Smart Phone就寫《耳邊Phone》，有共鳴的人就會記得。我哋都會寫勵志歌，想人知道有夢想嘅重要，所以一隻碟有好多元素，想畀正面訊息大家。」

不難發現他們的歌全是口語入詞，據說趙增熹曾找詞人幫忙，但ToNick覺得太詩意，最後還是自己包辦最切合風格。小龜說：「我哋講嘢係Straight forward，曲式亦適合直接嘅歌詞，好似軟硬天師、許冠傑嘅歌詞都係口語，好似同你講嘢咁，咁樣先會有人記得。」

夾Band難搵食是事實，但ToNick仍一路「黐住」音樂，除了接Freelance，亦投資在旺角開Band房出租，晨曦笑謂：「通常資深音樂人才做生意，我哋仲大膽，唔資深嘅音樂人都走去搞生意！」阿恒則覺得並非想像中難搵食，「好多人都靠音樂搵食，只要你一路行落去，就會諗到辦法，音樂可以爆好多嘢出嚟，好似Band房出租，電影配樂又得，搞Band Show，我哋將自己識嘅嘢不斷擴大。」識計數可以維生，ToNick搵食工具就是音樂，其實沒甚麼兩樣。

愈安穩愈無出路

ToNick有衝勁，又識走位，不怕錯，最多跌倒再來過，正如《T.o.N.i.c.k》歌詞：「傻得夠快活有貨熱血錯又怕咩喎，我信個世界冇嘢難倒我……最尾怕咩冇結果，起碼我做過。」自況意味濃，面對社會不少80後經常抱怨冇出路，晨曦說得好笑，「唔止80後，香港有一半人，都成日覺得自己死硬㗎喎！人要追求安穩，但太安穩又覺得冇出路，跟住好多怨氣，忘記當初自己嘅熱誠，相反我哋唔穩定，要教學、做生意、配樂先夠維生，但我哋反而更有主動性，因為我哋唔去𢱑撈就冇飯食，係忙，但搵到出路囉！」

有人覺得無出路，拒絕新事物，但ToNick最愛挑戰，凡事都一試無妨，成就創意。阿恒說：「當有新嘢出現，只有3種反應，一是『邊度得㗎，冇可能』，二是避開佢當睇唔到，三就係『即管試吓啦！』第三種係最好玩，你經歷咗又學到嘢，將來一定有用，就算玩完一輪輸咗，最多咪返去做番嘢，我哋呢一代底線係唔會死，亦唔係好使拚搏，咁點解唔試多啲新嘢？又可以享受過程，咁樣人生咪冇咁悶囉！」

後記：熱血醒覺

跟ToNick做訪問，你會忽然「熱血」咗，一方面是畀佢哋「黐線基因」激到血壓上升，但更多的是因為他們寧願「做過」好過「白過」的Guts，令到「只求碌過，但求無過」的自己，醒咗一陣！

P.S.ToNick叫我記住提埋佢哋12月23日晚上在旺角行人專用區「報佳音」喎！