不一樣X'mas趴踢提案

咪睇我平日薯頭薯腦，其實骨子裏，我是「Party Animal」。臨近聖誕新年，有着大大小小的派對等着我去狂歡，不過連續幾晚去趴踢，都咪話唔會厭。想有新驚喜？烹飪班+私房菜、油畫派對+BBQ，甚至Down to Earth玩到返屋企叫特色到會都有好介紹，不過先旨聲明，趁早預訂為先！

在這個奉旨吃喝玩樂、狂歡的大日子，慶祝節目多籮籮，可惜Party個個一式一樣，即使再愛開Party的，總有厭的一天。要突破要創新，不妨搞搞新意，今年就來一個不一樣的聖誕派對。

提案1：一站式　烹飪班+私房菜

開派對，好想親手煮幾味，但自己知自己事，好日唔下廚，廚藝點見得人？不如就趁佳節，齊齊搵大師傅惡補一下。在尖沙咀K11剛開業一個月的「Easy 123 Dining & Cooking Studio」，由鴻星集團所設，屬教室與私房菜的混合體，導師來自集團主打不同菜系的館子，經驗豐富、廚藝扎實。

這裏每天都有4至5堂烹飪班舉行，價錢約$400一堂（價錢會因菜式而有所不同），主題由甜品、點心、家常小菜、韓式泡菜至醬料均涉獵到。臨近聖誕，更推出不少應節甜品班，教大家炮製樹頭蛋糕、曲奇、聖誕薑餅屋等，課堂最多可容納20人，若想來個小型私密派對，湊夠6個人即可包堂，成班Friend學做薑餅屋應下節，做好後隨即拿到隔壁的VIP房享用私房菜，諗吓都覺得過癮。另Menu可因應Budget作修改，好有彈性，像今次我們介紹的6道菜均是得獎名菜，每位收費$588，一站式食玩Party勁充實！

Shop Info

Easy 123 Dining & Cooking Studio

地址：尖沙咀河內道18號K11商場221號舖

查詢：2628 0616

玩完煮飯仔，再過隔籬VIP房開餐。私房菜可自行設計Menu，但必須為集團旗下的菜式，今次小記試了6道得獎菜，部分為數月前在台灣美食展得到銀鼎獎的菜式，甜品更是今年美食之最甜品組的金獎，夠Gimmick！

鴻星得獎名菜 $588/位（10位起，需一星期前預訂，另收加一服務費）

提案2：BBQ派對食住畫

BBQ可謂派對活動的首選，想來點新意？一邊畫畫，一邊燒烤你試過未？位於中環的樓上畫室Oscary Wine & Art，今年推出聖誕派對，每人可得一幅50cm×60cm的油畫板，畀$200即可畫足4小時，另加$50更提供燒烤箱及食物讓你開個BBQ Painting Party，雖然食物款式大路，但店子容許客人自行買靚海鮮來燒，總算有個竇一齊慶祝聖誕。不妨就用畫畫代替相機，記錄這晚的開心時刻！

Shop Info

Oscary Wine & Art

地址：中環荷里活道15至19號歐士大廈1樓D室　　查詢：2964 9111

提案3：乾手淨腳　Home Party食鵝肝火雞

案頭文件堆積如山，開始有點精神不振，看看日曆，弊！答應了成班嘩鬼朋友親自煮幾味，可是至今，卻連一瓶酒、一塊扒，甚至丁點小吃都未準備，點好？還是請槍叫到會好了。坊間不少超市，甚至像CiboAmante這類意式高級雜貨店，一早為一眾大忙人做了準備。其中City'super今年選擇豐富，無論是芝士盤、海鮮刺身、風乾火腿沙律等，平均三、四百元有交易，而且有曾於法國米芝蓮3星餐廳工作的行政總廚Robert Fontana坐鎮，把外賣到會的菜式以Fine Dining賣相示人，更首次在傳統火雞上創新，不止加入矜貴鵝肝做Stuffing，更把其分開烹調，同樣加入雞汁、雞內臟等煮好再製成長條形焗香，令其保持原汁原味之餘，賣相亦見得人，加上不同特色的生果朱古力盤、雪糕火鍋等，一於約齊班Friend安坐家中來個終極Home Party！

查詢：（a）2375 8222、（b）2295 1108、（c）3523 1473、（d）2894 8663