本地薑發功 合金小雲Cute爆
小雲同小吉深入民心，不過講到玩具方面，選擇實在唔多，嚟嚟去去都係景品同毛公仔。本地品牌ActionToys最近就與日本嘅集英社合作，推出可動合金版本小雲，墜手Body擺到經典「篤屎」場景，同步上架仲有漫畫版鳥山明，背脊發條效果令人會心微笑，卡哇依程度連女友、老婆都Buy，打孖買晒返屋企，相信佢哋都會爭住玩呢！
小雲 真布衣KO全膠宴
近年嘅小雲玩具多數都係「全膠宴」（例如早前嘅CM's出品），可動部分又少，連服飾衣着都只係塗裝表達了事。今次EX合金就用料十足，全身骨架跟腳掌都用上墜手Die-cast，雙腿雖短都有雙重關節，膊頭關節又夠實淨，穩陣之餘可動性都算唔錯。試玩過後，最令筆者畀Like係小雲嘅招牌桃紅色黃邊短袖Tee加藍色工人褲服飾，全部用織布車工製造，而且大部分縫線位都冇爆口，QC做到足！美中不足嘅係小雲造型有啲偏高，如果矮番1/4，身形再肥多少少，就Fit晒早期漫畫裏面嘅造型。
Gimmick方面，小雲備有大口Look及O嘴Look兩款，採用磁石換面設計，頻頻變臉都唔怕整斷接合位嘅支柱，襟玩得多，加埋PVC製嘅Cap帽、以及「篤屎棍」及多款造型手掌，就可重現小雲多款經典低能甫士。另外隨盒附有景品小吉一隻，雖然只得頭部、雙手可以扭動，但ABS質地令整體造工堅固細緻，最抵讚係頭上嘅觸角用軟膠製成，唔易爛。
鳥山明 肥肚牙籤腳企得穩
原著擔任間場做解說及搞Gag嘅漫畫版鳥山明，主體骨架、下盤、雙腳全部用Die-cast炮製，當中髖關節更可前後左右擺動，腳踝Ball Joint亦能夠令腳掌屈曲，整體關節紮實又有超強接地性，確保肥肚牙籤腳造型都企得穩。另一方面，驟眼睇頭部與身體好似「無頸」，其實內藏斜向支架連接，令頭部都有一定幅度左右扭動，至於鉗形手掌亦可換件重現揸筆姿勢。最過癮係扭動背脊發條時嘅「嘶嘶」齒輪聲，雖然未能做到曉行曉走，不過已經好有80年代嘅上鏈玩具Feel。
查詢：2390 9843（Action Toys）
Fewture Models EX合金小雲訂購價：$780
EX合金鳥山明訂購價：$390
包括「篤屎手」在內，小雲嘅造型手掌都幾豐富，但面相組件得兩款，少咗啲喎。
Cap帽及眼鏡都係可拆式設計，總共玩到八個面相Look。
小吉屬於景品，可動位置只有頭部及雙手。
小雲頭部略重，擺坐姿時要花多少少耐性就位。
換面時採用磁石定位，比傳統嘅插入式榫位襟玩得多。
唔戴帽嘅話，隨盒備有一小撮頭髮組件，插喺後尾枕，成個造型就完整晒。
配合專用台座，就擺到跳跳紮嘅動感甫士。
鳥山明配件只得墨水筆、鉗形手掌與發條器，尚欠下半身嘅坦克底盤，可惜！
全腿使用合金元件，令接地性大大提升。
手臂有單關節，鉗形手掌仲可以開合。
內藏斜向支架連接頭部，豬嘴亦有少少活動幅度。
轉動發條會發出「嘶嘶」齒輪聲，發條同時亦會自動反方向轉動。