聖誕喪影 Apps

現時手機影相愈來愈靚，尤其係新推出的iPhone4S，拍攝水準已經拍得住唔少DC仔！而且用iPhone影相最煞食之處，係有大量影相Apps畀大家玩，更有因應唔同節日專題的特別版Apps畀你用，呢期最Hit主題當然係聖誕節啦！影相Apps部分免費，就算要畀錢，大都只係US$0.99，一杯奶茶嘅價錢都唔使，就可以玩盡各種特效，超值！

《White Xmas》飄雪節日裝飾

在App Store一睇見《White Xmas》App的Logo，即時Feel到好有聖誕氣氛！此App唔似其他影相App咁多濾鏡特效，但操作介面至功能都好有Xmas感覺。程式內左上角的鹿頭其實係補光燈開關，唔夠光記得用佢；正上方的聖誕樹就可以畀大家在畫面上加上各種聖誕裝飾跟配套；右下角的雪雪就可用來控制畫面上飄雪的大小、形狀同下雪密度，要影張好有節日氣氛的聖誕相用幾秒就搞掂，一般DC仔又點做得到先？

下載費用：免費

《PowerCam》超多特效可拍片

可以一出就打入Free Download前列位置，足證《PowerCam》功能夠多又好玩。雖然程式並無聖誕主題功能，不過就加入超大量濾鏡，如Moody的Neon霓虹燈特效、Shine B閃閃令特效等，影聖誕相都幾啱用，甚至連移軸鏡都有得玩！但講到最正係唔止影相用得着，就連拍片都一樣可以加上各種特效。12月內可免費下載，唔係唔裝呀？

下載費用：本月免費

《HalfCamera》潮味半格

唔知大家有冇影過「那些年」的半格相機，即是一格菲林可以影到兩張相，可以慳番唔少菲林錢。《HalfCamera》App介面設計得幾似半格相機，「機背」上還設有Film Counter畀大家睇吓用剩幾多菲林。雖然特效欠奉，但最抵死係顯示相片時會用整條菲林形式顯示，影完一條12格菲林後就可「沖曬」出來放在「照片」內，呢一蚊美金都幾抵玩。

下載費用：US$0.99

《Vintage Cam》13款懷舊特效

顧名思義係一個懷舊相機，或者講得清楚啲，係一個加入大量懷舊特效的影相App。《Vintage Cam》設有多達13個懷舊特效，色水靚到震，唔使執Effect就可以拍出好有氣氛的相片，外出影吓聖誕燈飾可收意想不到的效果，即使布置平平無奇，都可以變到好有吸引力。

下載費用：免費

《Frosty Camera Free-Christmas Photo Booth!》霜凍Layer

另一個專為聖誕節推出的影相App，不過大家唔好期待這個程式會影得出有幾Sharp的影像，反而鍾意影相鬆郁矇風格的朋友就會Buy。啟用程式後會有四格霜凍的效果畀你揀，從中揀選加在圖像上的霜冷Layer，個人覺得合成相效果唔算話好靚，但勝在夠特別。

下載費用：免費

《MagicalLens》聖誕萬能Key

《MagicalLens》係一個Key人頭的影相App，將所拍攝到的人樣Key在預設的主題相上，概念唔新，但叻就叻在程式會自動用一、兩秒時間，幫人面調色同調整光暗度，令佢能更完美地Key在主題相上。不過預設只得懷舊飛機師、肥仔、印第安女人三張主題相，想玩埋聖誕特別版如戴聖誕帽的蒙金麗莎，就要畀多US$1.99先玩得到啦！

下載費用：免費（追加人像：US$1.99）