能屈能伸　SR至型特搜

選特首，唔係七百萬香港市民人人有份，不過玩「特搜」就來者不拒。Super Robot超合金前排出完「豪快王」，設定預咗可以同其他超級戰隊系列玩連動，果然SR Chogokin系列嘅第二彈就由「DekaRanger Robo」接棒，後者正係2004年喺日本首播嘅《特搜戰隊》主角機，係首支以警察為題材嘅超級戰隊，大玩追捕宇宙大賊嘅橋段。講番今次嘅SR超合金版本，全身關節交足貨、夠靈活，又送埋可以安裝於前作豪快王嘅連動配件，「毒性」咁高，戰隊迷幾難走得甩。

搶錢連動配件

作為第28套超級戰隊系列作品，《特搜戰隊》用咗「宇宙警察」做主題，所以主角機DekaRanger Robo會帶齊警章、警槍及手銬等裝備去捉宇宙大賊，SR超合金亦跟足劇情，隨盒附上嘅警槍Single Cannon及手銬都大大件，再跟埋大劍Jugement Sword，一手揸槍、一手舞劍夠晒台型。不過玩玩吓，就會發覺隨盒嘅特搜戰車及靈格斯槍炮都唔知裝喺邊，原來唔係畀DekaRanger Robo用，係留畀同系嘅豪快王。即係話，冇買到豪快王嘅話，以上附件就變廢件；買咗豪快王又唔買DekaRanger Robo，卻會若有所失，Bandai果然識做生意，夠絕！

足料金屬關節

雖然SR超合金冇得玩變形合體，但少咗以上顧慮，令關節可動性有更大發揮，DekaRanger Robo嘅身形亦變得修長矯健，唔似傳統機械人咁笨重遲鈍，問心嗰句，仲Chok過特攝劇嘅原裝版本。具體嚟講，肩膀關節可以拉出90°彎曲，尤其是頭部改用Ball Joint，比豪快王靈活得多。至於豪快王畀人鬧爆嘅前臂造型，今次就正常番晒，仲加多一個小關節，以便手腕擺到握劍向前刺嘅甫士。此外，胸甲、小腿、腳掌、肩膀等地方都用埋金屬部件，又有唔錯嘅塗裝工夫，細小嘅「S.P.D」字樣都清晰冇走樣，就連腰部關節都採用金屬物料，扭得多都唔怕蝕。

查詢：2433 1828（瑞華行）