3DS版芒亨任篤斬碎龍

正所謂：「得芒亨，得天下。」明天正式推出的最新攜帶版作品《Monster Hunter 3（Tri）G》落戶N3DS，除了新增魔物、加強武器等指定動作之外，Capcom亦因應N3DS具備輕觸屏幕加入輕觸快捷鍵，開地圖、換道具或使出唔同招式，都可一篤搞掂，聯同三名同伴爽劈今集主打魔物「碎龍」！Capcom在今年TGS都公布咗嚟緊《Monster Hunter 4》會出3DS版，「芒亨」Fans們應該唔使諗，快啲入部3DS啦！

變種哥斯拉玩爆破

每一集《芒亨》都例牌有好幾隻全新魔物登場，今集嘅主打魔物係外形有啲似變種哥斯拉，頭頂有凸起頭冠的「碎龍」布拉基迪歐斯。以兩腳行走的魔龍，原則上雙手係弱項，但呢隻「碎龍」卻雙手強壯有力，而且仲附上具爆炸性的螢光綠色黏菌，畀佢打中已經扣咗唔少血外，跌在地上的黏菌更會在過一段時間後，如地雷一樣自爆！一面要避開巨大魔龍攻擊外，仲要留意唔好踩中「地雷」，超難打！兩年前Wii版《Monster Hunter 3》首度加入水戰，來到加強版《MH3G》當然亦不例外，今集就要落水狩獵行動異常迅速的加諾托托斯；而新登場的魔龍，就有擅長尾巴攻擊的櫻火龍利奧雷亞及能於空中迅速攻擊獵物的蒼火龍利奧雷烏斯。另外，今集魔物都顯得較「人性化」，會因為體力耗盡而面露疲態，要去捕食同休息，唔係獨沽一味見人就殺！

個人化操作介面

相對早前在PSP上推出的手提版「芒亨」，N3DS版《MH3G》由於手提機機身設計唔同，操作上就有不少地方需重新適應。例如Wii版《MH3》用上體感揮Wiimote斬龍，N3DS版則換上輕觸式玩法，可用上下畫面簡化操作功能。下畫面會設有六格位置，大家可因應自己需要將唔同功能放入這六格範圍之內，地圖、特殊功能或唔同道具便可放在其中，擺位完全個人化，設計得都幾貼心。N3DS機身亦比較窄，再要加上右方四粒功能鍵轉視點都幾有難度，所以今次Capcom都特別出埋連右Analog掣底座的遊戲同捆版，比遊戲淨價只係貴$1,200左右，呢啲錢值得畀！

改造武器打神級任務

今集同樣設有單人跟最多四人的Local連線協力玩法，單人玩法據點為摩加村，可以在村內購入各種必要的武器、狩獵用道具和進食等。在單人任務上更會遇上兩位幫手，就係造型有趣的奇面族茶茶同卡楊巴，他倆有趣之處在於會跳舞幫助角色狩獵，而且會佩戴令人估都估唔到的特別面具提升能力，例如可點火的油燈面具，可幫玩家烤肉的烤肉面具，Cutie程度不下於艾路貓。至於多人任務據點位於丹治亞港，場景設計都好有異國風味，提供唔同任務，由最紙級到神級的G級任務都有。要應付神級任務，便要配合更強武器先得，今集亦強化武器裝備，如提供「解除限制器」改造方法，將弓槍改造提升彈藥數量及攻擊力等，玩落都有新鮮感。

類　　型： 狩獵

開　　發： Capcom

平　　台： N3DS

推出日期： 12月10日

售　　價： 約$600

查　　詢： 2359 7998