超合金芬奇出盡機關爆笑彈
芬奇（Franky）無端端出超合金？一啲都唔奇，大家試想Bandai嘅產品分類邏輯，就明白箇中道理，例如人物角色出Figuarts，機械人就出超合金，《One Piece》嘅船匠芬奇身為改造人，經常為身體進行各種機械改造，放飛彈兼彈拳頭，肚腩仲有可樂製冷能量裝置，咁有Gimmick，唔出超合金真係嘥咗！
和尚頭變飛機頭
雖然超合金芬奇本月中先至上架，不過多得廠方及代理協助，可以率先玩到試辦。講起芬奇全身嘅改造機關，除咗部分實用嘅武裝強化，其餘都係搞笑Gimmick，最頂癮莫過於「換髮型」功能，原著中按住個鐵鼻三秒，和尚頭會變成Chok樣飛機頭，合金版本雖然做唔到撳住個鼻識變身，不過夏威夷衫背後另有開關，按住背脊會左右張開，內藏嘅飛機頭髮型就會從裏面扳出嚟，冚住原本嘅和尚頭，再戴埋副黑超更加英！此外，作為能量補給嘅肚腩「雪櫃」都有機關，放到三支可樂，至於右手嘅工具箱，包括常用嘅水喉通、士巴拿等，呢款超合金都做到。
大膊頭射飛彈
講完搞笑機關，轉頭睇睇芬奇嘅武裝，如同故事一樣，芬奇將膊頭改造成大大個金屬鐵球，而且打開「BF-37」汽門仲射到飛彈，合金版亦有相同玩法，只需按下膊頭後面嘅開關，就可以射飛彈。仲有芬奇嘅常用技—強壯右手，從右手射出右拳頭連強壯鐵鍵，超合金就以換件重現，不過未有內藏彈弓，可惜咗啲。
另一方面，超合金芬奇為咗確保上重下輕都企得穩，所以整個下半身骨架跟雙腳銀色支架部分，都用Die-cast炮製，雙手就用ABS塑料製作，故此就算「香雞腳」都尚算企到，可惜活動關節偏少，如想擺出一副動感「戰鬥格」，就要善用台座輔助。
查詢：2433 1828（瑞華行）
Eiichiro Oda/Shueisha, Toei Animation
＊圖中商品為監修，修正中樣本。可能與實際商品有異。
超合金《One Piece》芬奇
建議零售價：$1,009（預計本月中上架）
芬奇雙手長過雙腳，整體造型似足猩猩。
Chok樣全面睇，提醒大家黑超配件超細，容易唔見，另外換咗飛機頭後，無法轉動頭部。
強壯右手要靠換件方重現拳頭連接鐵鍵、從手腕射出嘅情景。
膊頭藏有飛彈彈射裝置，彈頭仲有大小兩款任換。
高難度舉臂招牌甫士，最好都係利用台座借力。
右手工具箱可隨意開合，裏面嘅水喉通仲拆得出嚟。
為咗應付平時船隻維修等精密工序，芬奇雙掌可靠換件伸出工具小手。
連接Body跟三角褲部分內藏Die-cast，唔怕扭得多會斷。
打開肚腩嘅「雪櫃」門，就有被芬奇視為命根嘅可樂。
膝蓋只得單關節，好在腳踝、前掌部分仲有少許屈曲空間。
配件一覽，最正當然係揸可樂嘅造型手配件啦！