《Kinect：Disneyland Adventures》唔使排隊隨時玩盡

只需$259就可全年任玩「迪士尼樂園」？大家一定質疑，買張最平的「奇妙處處通」都要$650，仲唔包好多個Weekend，究竟點可以咁平呢？其實係講新推出的體感遊戲《Kinect: Disneyland Adventures》，只要屋企有部Xbox 360主機連Kinect感應器，就幾時都可以探吓米奇老鼠、白雪公主同巴斯光年，而且遊戲內嘅迪士尼樂園仲有八個主題區，似足深入奧蘭多總壇呢！

分成八大主題區

香港迪士尼樂園計埋剛開設的「反斗奇兵」主題區，都只係得五個主題區，但Kinect遊戲版的版圖就大得多，設有八大主題區，計有「美國小鎮大街」、「明日樂園」、「邊疆世界」、「幻想世界」、「米奇卡通域」、「動物天地」、「紐奧爾良廣場」同「探險樂園」；每個主題區都有各自的景點、小遊戲、迪士尼角色跟商店，令人恍如置身樂園。如果想探吓巴斯光年、三眼仔或者史迪仔可以去邊？原來他們身處「明日樂園」主題區，到時可以同巴斯光年玩星際歷險，及同三眼仔影相留念。

攬攬白雪公主

樂園咁大，要點樣安排行程先玩得最多呢？遊戲版的好處就是想去邊個主題區都好方便，只要對住Kinect鏡頭舉高雙手就會進入樂園地圖及Menu，好容易就可去到想去的主題區，省回不少腳骨力，而且亦唔怕行行吓見到遊客在花圃「施肥」。遊覽樂園時會遇到超過35位迪士尼人物，而且可用體感操控跟角色們進行互動，如見到白雪公主時既可同佢合照、擊掌，最正就係可同佢攬攬，好溫暖呀！當然大家實際上只係攬住團空氣，但有時迪士尼角色會要求大家幫手完成小任務，事成後更會送贈小禮物。

攻破小遊戲買靚衫

收集物品是遊戲最吸引人的地方，除由角色們送贈的小禮物，角色的簽名跟相片之外，還有大量服裝跟道具是需要金錢購買。跟現實情況有少許不同，大家進入遊戲後可玩小遊戲賺錢，再用來購買服裝和道具，唔使用真錢買，咁就唔會搞到碌爆卡。在遊戲之中除了可玩到各式各樣機動遊戲外，亦可透過全身郁動方法玩盡多個好玩小遊戲賺錢，譬如可以同巴斯光年一齊星際歷險，一面避開敵人，一面用手瞄準以激光攻擊，又或者可以同小飛俠Peter Pan手牽手翱翔天空，而且遊戲可以支援雙人齊玩，第二個玩家可以隨時加入，闔家歡最啱！

INFO

類　　型：其他

開　　發：Frontier

平　　台：Xbox 360 Kinect

推出日期：已推出

售　　價：$259

查　　詢：2359 7998