on.cc 東方互動主頁

潮爆貨Van Volkswagen Caddy 1.6 TDI

以前聽到客貨車這名詞，只會聯想到老套。不過近年貨Van設計愈來愈潮，又有埋自動波及雙趟門，平日用嚟開工、假日載屋企人去街都啱用。早前喺德國測試咗新一代Caddy 1.6 TDI，既有5.7L/100km低耗油量，載物空間仲非常大，滑水板、大型遙控飛機都放得落，一般房車冇得比。

本港大部分客貨車都嚟自日、韓兩國，歐洲車款少之又少，原因並非冇車好揀，而係來貨太少、供不應求。歐洲車向來標榜扎實、硬淨，揸住Caddy喺德國公路上以160km/h巡航，途中遇上強勁側風，依然穩穩陣陣，同揸MPV差唔多。外觀上，新Caddy跟上一代分別唔大，車頭承襲咗新世代家族面譜，加埋前、後泵把噴埋與車身相同嘅顏色，令商用味大減。如果唔打開個尾廂畀人睇，望落都幾似七人車。

DSG唔使吊極力子

近年愈嚟愈多人鍾意揸自動波客貨車，貪佢夠方便、唔使「吊極力子」，喺窩打老道塞上獅隧都唔怕腳仔軟。VW著名嘅DSG雙離合器自動波，亦用埋喺全新Caddy身上，而且係七前速版本。比起傳統嘅五速、六速波箱，一方面可以減低耗油量，又可以減低轉波時嘅轉速落差，加速更順。動力方面，102ps馬力嘅1.6公升TDI引擎，特點係低扭輸出強勁，喺1,500rpm就供到25.5kgm扭力，載滿貨上斜都唔怕冇力。

Maxi版已經輸港

內櫳方面，到處都有儲物格，就連車頂、門邊以至地台底都預留位置擺放雜物，實用性超高。喺德國測試嘅Caddy係五座位布局，後座可整排向前摺起，增加車尾載物量，不過輸港版受條例所限，要喺客艙及貨艙之間加裝分隔網。廠方指出，輸港版本將會係Caddy Maxi，而且已經到埗，車長較Caddy增加咗470mm，載物空間更大，又有雙趟門設計。目前廠方已將Halogen頭燈、後泊車感應列為標準配置，又有埋起步防溜後系統，車價僅為$229,055。

第一代係Pick Up車

第一代Caddy於上世紀80年代推出，當時以第一代Golf為基礎開發出嚟，最初推出嘅型號係Typ 14，係一款Pick Up貨車，引擎容積由1.0至1.8公升不等，有汽油及柴油引擎選擇。目前Caddy已發展至第三代，而且係一個龐大嘅車系，當中包括Caddy Panel Van、Caddy Kombi、Caddy Life及Caddy Camper等，每個型號都有唔同設定，至今Caddy喺全球嘅累積銷量已經超過150萬輛。

30周年紀念版

為慶祝Caddy推出30周年，廠方喺今年嘅法蘭克福車展上，發表一款名為「Caddy Edition 30」嘅紀念版型號，車身採用雙色烤漆，仲額外提供紅、綠、黃等鮮艷顏色作選配，輪胎就換咗17吋拋光五幅式款式。車廂方面，Alcantara麂皮座椅及多功能軚環已經列為標準配備，引擎就有三款柴油、一款電油選擇，馬力由100至170ps不等，仲可揀六速手波或七速DSG。