我至癲EB 1/6戰損版Scarface

數黑幫電影的經典角色，香港有《英雄本色》Mark哥，外國有《教父》Vito Corleone，不過最癲喪嗰個都係《疤面煞星》（Scarface）嘅Tony Montana（Al Pacino飾演）。既然咁入腦，Enterbay特別為佢塑造咗1/6「戰損版」（The War Version）Action Figure，採用新素體及新塗裝技術，面相上嘅皮膚質感栩栩如生，配合M16步槍，真係生人勿近！

《疤面煞星》喺Figure界唔算新題材，香港How2work、美國SideShow及南韓Blitzway都出過，所以今次Enterbay一定要搞搞新意思突圍，選咗電影最尾一幕，採用Tony Montana最兇、最癲嘅形象做藍本，保證喺Figure界從來未見過。

以一敵眾　超級入腦

大家有留意Enterbay嘅最新動向嘅話，都會察覺到自從真人版《龍珠》後，佢哋嘅主要選材轉向荷里活經典電影，今年就有《這個殺手不太冷》，以及珍寶級1/4嘅《未來戰士2》，口碑及銷量都唔錯。然而，《疤面煞星》對80後等主流玩家可能較為陌生，點解會構思呢個Project呢﹖Enterbay發言人表示︰「我哋老闆阿Bill一直好鍾意呢套戲，尤其是片尾Al Pacino一人單挑十幾人，堪稱黑幫電影中最癲嘅結局，將佢化成Figure，一定比其他造型更具代表性。」

神似寸嘴　囂張到爆

就量產版所見，由Y.J.Park負責嘅頭雕像真度極高，反白眼、皺紋等細節都兼顧得到，尤其是微微半張嘅嘴巴，更將角色嘅囂張性格表露無遺。廠商更指今次係佢哋首度應用多層立體塗裝技術，膚色一層冚一層，驟眼睇質感同真人冇分別；據知Y.J.更曾遠赴廠房親自監工，確保質素達到要求，製作認真。特別一提為避免大貨與樣本有太大差異，由呢款Tony Montana開始，Enterbay唔會再接受預訂，改為在正式供貨前三日通知會員，避免無謂爭拗。

篋內有料　史上最毒

Al Pacino當年較為瘦削，為忠於角色，廠方特別開發全新素體RM-5，更瘦、更高，仲有40個關節，胸部前方冚咗一塊PVC軟膠，將周圍嘅關節隱藏起嚟，望落自然舒服好多。服裝亦跟足電影造型，包括一套黑色西裝、人造皮帶連釦及仿真皮鞋。配件就有齊手錶、黑超、金鏈及金勞等，最搞笑係手提篋內藏有可卡因，堪稱玩具史上最「毒」Figure。不過有讚都有彈，地台只係傳統鐵板，相對之前Blitzway送埋大班椅，削咗少少喎。