老餅新帥Look S.I.C. Skyrider

除咗玩埋Predator，竹谷老師未有放棄老本行《幪面超人S.I.C.》，第60款拉打S.I.C.已經推出，今次玩懷舊，揀咗昭和年代嘅Skyrider做對象。顧名思義，呢位拉打嘅最大特點就係飛天，故此隨盒跟埋透明底座，可以穩穩陣陣托住Skyrider擺出飛行甫士。造型方面，雖然唔似得以往嘅S.I.C.咁陰沉，但係都貫徹大師對肌肉紋理嘅獨到處理手法，無論四肢或胸腹嘅每組肌肉都有精工刻畫。不過可動性方面只屬一般，髖關節嘅活動幅度相當有限，千祈唔好妄想做到一字馬，最大問題係「硬頸」，左右扭度幅度極細，更慘係幾乎唔可以「抬頭做人」，擺飛天甫士時受到頗大限制。嚟緊嘅12月及下年3月，S.I.C.就會分別出埋同屬昭和年代嘅Super 1及ZX，希望到時唔再硬頸啦！

量產拉打 SHF照出

量產兵唔係高達專利，拉打一樣有，講到最有型、最入腦嘅「量產型拉打」，非《幪面超人555》嘅Riotrooper莫屬；難得Bandai未有忘記呢班「大茄」，幫佢哋推出埋SHF版本。由於原著造型比主角Faiz精簡得多，製作上相對都易咗，所以賣相都幾有原著神髓，驚喜位係左前臂印咗RIOT字樣，夠細心。附件方面就有SB-RTH Axelaygun，設計跟足原著，屈起就可以由短刀變成手槍。話時話，Riotrooper出親場都係成班人圍毆主角Faiz，想重現呢一幕嘅話，唔知要買幾多隻先似樣呢？

查詢：2433 1828（瑞華行）