on.cc 東方互動主頁

《The Adventures of Tintin：The Game》丁丁穿梭全球大冒險

今個星期「丁丁」出場了，所講的正是已有82歲的比利時「國寶」Tintin。雖然香港人沉溺日漫多於一切，比利時漫畫、卡通頂多只係認識藍精靈（The Smurfs），但丁丁在歐美Fans眾多，連兩位荷里活頂級大導史提芬史匹堡跟彼德積遜都要聯手打造電影版《The Adventures of Tintin》，足證一把年紀兼身材瘦削的記者丁丁地位崇高。趁3D電影今個星期在港上畫，不妨買番隻同名官方遊戲《The Adventures of Tintin: The Game》湊吓熱鬧，遊戲美術做得極出色，雖然劇情同場景設計係有點老套，但今期興集體回憶嘛！P:從模型發掘沉船寶藏

無論大家叫佢「丁丁」又好，「天天」也好，即使未睇過原著漫畫或卡通片都好，大家都應該認得出這位額前有一束向上捲起頭髮的瘦弱大男孩。香港遲遲都無引入丁丁卡通，加上創作丁丁的漫畫家Georges Remi在廿多前年過身後都無授權其他人繼續創作，所以新一代唔識這經典漫畫角色都唔出奇。當然幾十年前的世界觀同現時大不同，當年周圍打獵好平常，亦無咁講究種族平等的觀念，但到2011年面世的電影跟遊戲版，都將現時看似比較具爭議性的枝節刪掉，故事以丁丁在市集中購入獨角獸號古代帆船模型開始，到發現隱藏在模型中的藏寶圖，再引伸到穿梭世界各地大冒險。

沙漠峽谷飛三輪車

遊戲版跟電影版都以3D呈現，丁丁只是立體化，並無老去，而且身處的年代就停留在幾十年前，今時今日睇番都好有懷舊風味。雖然遊戲內容都係穿梭全球大冒險，飛天落海，但大家千萬唔好將佢同《Uncharted》等遊戲相比，在沙漠峽谷飛車時亦只係以三輪電單車代步，駕駛飛機穿越狂風暴雨時亦只係駕駛單座位螺旋槳飛機，削就削啲，不過都幾刺激同新鮮。根據角色設定，身為記者的丁丁，身材瘦弱但身手了得，遊戲開始無耐就要在後巷以寡敵眾，以一人之力抵禦諗住用雙倍價錢搶購模型的財主同佢班手下。如想更「原汁原味」感受當中情懷，可以將遊戲的對白同字幕轉成法文，當然有番咁上下法文根柢先好試。

解鎖多用三角色

若認識《Tintin》漫畫，主角其實並唔係得丁丁一個，早年漫畫就以《Tintin et Milou》為名，Milou就係指丁丁的小狗Milou，英文名叫Snowy；另外還有鍾意飲威士忌的船長Captain Haddock，遊戲之中更可以特定關卡控制佢哋三個進行冒險。正如前文所講，丁丁身手較靈活，還可使用帶鈎爪的手槍在難以接觸的位置上取物，亦能將敵人勾到身邊再進行攻擊；而Snowy就因身形細小，可以捐窿捐罅去到人類去唔到的地方；至於船長當然係賣力量，可以掟爆酒桶甚至打塌牆壁；嫌未夠的話，還可以在過程中解鎖使用多三個角色。

遊戲可以單人模式進行或以雙人協力方式進行，玩法都有點變化，而且在遊戲關鍵時候更會播放電影版重要場面，到時自然更有共鳴。遊戲最抵讚是畫面表現甚出色，色調、場景跟動作都跟電影版不相伯仲，而且兩個平台版本都可對應各自的體感操作系統，都冧得掂丁丁迷或普羅機迷。